Ыттаах хаһаайыттары уопсайа 689 тыһ. солк.ыстарааптаатылар

Ахсынньы саҥата Дьокуускайга баар ыты быстах кэмҥэ тутар пууҥҥа ас-үөл тиийбэтин туһунан айдаан тахсыбыта.

Ол эрээри балаһыанньаны волонтердар омуннаан суруйан бар дьонтон көмө көрдөөбүттэрин туһунан пуун салайааччыта Екатерина Безрученко иһитиннэрэн турар. «Билигин өрүс суолунан сырыы баар буолан ас-үөл кыһалҕата суох», — диэн этэр кини. Бэлиэтээн суруйдахха, 2022 сылтан ыты быстах кэмҥэ тутар пуун аата «Приют животных» диэҥҥэ уларыйбыта. Приютка билигин тыһыынча кэриҥэ ыт иитиллэн турар.

Маны сэргэ, ити сылтан ыттаах хаһаайыттарга миэрэ кытааппыта.  Билигин ыты томторуга суох илдьэ сылдьыы иһин ааспыт сыл ахсынньытыттан ыстараап суумата 1000-3000 cолк. тэҥнэспитэ. Быраабыланы иккистээн кэһии иһин ыстараап 3000-5000  солк. диэри үрдүүр. Ааспыт сыл түмүгүнэн ыттаах хаһаайыттарга уопсайа 689 тыһ. 600 солк. ыстарааптаабыттар. 274 хаһаайыҥҥа сэрэтии оҥоһуллубут. Билигин даҕаны административнай эппиэтинэскэ тардыллыы сүрүн биричиинэтинэн ыты көҥүл-босхо ыытыы буолар.