Үтүө санаа, өйөбүл олоххо кынаттыыр

Саха сиригэр байыаннай дьайыы кыттыылаахтарын уонна кинилэр дьиэ кэргэттэрин өйүүр дьаһаллар тиһиктээхтик олохтоноллор, уталытыллыбакка толоруллаллар. Онуоха «Аҕа дойдуну көмүскээччилэр» пуондаларын Саха сиринээҕи салаата төһүү күүс буолар. Судаарыстыбаннай пуонда филиалын биир сүрүн соругунан бэтэрээннэргэ уонна кинилэр дьиэ кэргэттэригэр бары өттүнэн көмөнү оҥоруу буолар.

«Аҕа дойдуну көмүскээччилэр» пуондалара социальнай уонна мэдиссиинэ өттүнэн доруобуйаны чөлүгэр түһэриини, уйулҕа өттүнэн туруктаах буолууну,  санаторийга-куруорка эмтэнэ барыыны, үлэ көрдүүргэ көмөнү, о.д.а. хааччыйар. Ол туһунан пуонда бэйэтин социальнай ситимнэригэр сырдатар. Бүгүн онтон талан, туох үлэ ыытылларын таһаарыахпыт.

Пуондаҕа 5498 киһи сырытта

Ааспыт нэдиэлэҕэ СӨ Бырабыы­талыстыбатын Бэрэс­сэ­дээтэлэ Кирилл Бычков «Аҕа дойдуну көмүскээччилэр» пуон­даларын үлэтин-хамнаһын билистэ.

Пуонда Саха сиринээҕи салаата аһыллыаҕыттан 5 498 киһи 17 215 кыһалҕа­лаах боппуруоһун быһаарта­раары көмөҕө наадыйбыт. Онтон 15367 быһаарыллыбыт. «Аҕа дойдуну көмүскээччилэр» пуон­даларын Саха сиринээҕи салаата байыаннай дьайыы кыттыылаахтарын, бэтэрээннэрин уонна кинилэр дьиэ кэргэттэрин көрсөргө мэлдьи бэлэм. Пуонда сүрүн сыалынан дьоруойдарга сөптөөх болҕомтону уонна өйөбүлү оҥоруу, хас биирдии киһиэхэ тус сыһыаны олохтооһун буолар.

Санатан эттэххэ, «Аҕа дойдуну көмүскээччилэр» пуондаларын Саха сиринээҕи салаата маннык аадырыска баар: Дьокуускай к., Ойуунускай уул. 41/1.

Психолог көмөтө

Дьокуускайдааҕы психоневрологическай диспансер психологтара Константин Кычкин уонна Евгения Львова байыаннай дьайыыга сылдьар уонна онно өлбүт байыастар ийэлэригэр, кэргэттэригэр туруктарын чөлүгэр түһэрэргэ анаан психологическай тренинг ыыттылар.

Бу көмө сыалынан-соругунан ыгылыйыыттан, айманыыттан өй-санаа ыһыллыытын, дууһа ыгылыйыытын холкутатыы, күүрүүнү устуу, до­­руобуйаны чөлүгэр түһэрии буолар. Тренинг кэмигэр иһитиннэрии, сэһэргэһии, арт-терапевтическай эрчиллии, релаксационнай эрчиллии уо.д.а. ньымалары туһаннылар. Тренинг кыттыылаахтара дьарык кэмигэр үүйэ-хаайа туппут бэйэлэрин санааларын үллэһиннилэр, тулалыыр дьон кинилэри өйүүллэрин биллилэр.

Өйдөөх көмөлөһөөччү

Байыаннай дьайыыга сылдьан бааһыран хараҕынан көрбөт буолбут бэтэрээн «Аҕа дойдуну көмүскээччилэр» пуондаларын өйөбүлүнэн «Робин» диэн өйдөөх көмөлөһөөччүнү тутта.

Борис 2023 с. балаҕан ыйыгар байыаннай дьайыыга барбыт уонна биир кыргыһыыга бааһыран, көрбөт буол­бут. Уол өр кэмҥэ госпитальга сытан эмтэнэн баран 2024 сыл тохсунньу бүтүүтэ дойдутугар төннүбүт. Киниэхэ Евгения Каменяр диэн со­­циальнай координатор сыһыарыллыбыт, кини бэтэрээҥҥэ сөптөөх мэдиссиинэ докумуонун хомуйарга көмөлөспүт, ол түмүгэр кылгас кэмҥэ пуонда эспиэртнэй сэбиэтэ аныгылыы бырагыраамалаах аппараатынан хааччыйарга быһаарбыт.

Итини таһынан, социальнай координатор көмөтүнэн 1 группалаах инбэлиити көрүү-истии иһин толуйуу төлөбүрүн боппуруоһа быһаарыллыбыт, психологическай көмө оҥоһуллубут. Билигин бааһыран эт-­хаан эчэйиитин ылбытын иһин страховка төлөбүрүн уонна доруобуйатынан сулууспаттан босхолонуу боппуруостара быһаарылла сылдьаллар.

Бу күннэргэ «Аҕа дойдуну көмүскээччилэр» пуондаларын Саха сиринээҕи салаатын салайааччыта Алексей Александров бэтэрээҥҥэ «Робин» диэн өйдөөх көмөлөһөөччүнү туттарда. Бу тэрил искусственнай өйүнэн хааччыллыбыт уонна куолас көмөтүнэн дьон сирэйин билэргэ, иннигэр туох моһол баарын биллэрэргэ, уулуссаҕа уонна ­дьиэҕэ харгыһа суох сылдьарга көмөлөһүө.

Бэтэрээн күрэххэ кыттарга бэлэмнэнэр

Ааспыт сылтан «Аҕа дойдуну көмүскээччилэр» пуон­даларын Хаҥалас улууһу­нааҕы салаатын координатора Екатерина Перевалова Игорь М.-ҥа сыһыарыллан үлэлиир. Игорь байыаннай дьа­­йыы иннинэ силовой структураларга үлэлээбит, успуордунан утумнаахтык дьарыктаммыт. Байыаннай дьайыыга 2022 сыл барбыт. «Ахмат-спецназ» этэрээтигэр сылдьан Соледары ылыыга атаҕар улаханнык бааһырбыт.

Ол кэнниттэн үгүстүк Игорь санаата түһэр буолбут. Кулун тутарга байыаннай дьа­йыы бэтэрээннэрин ортотугар оҕунан ытыыга РФ ус­­пуордун маастара, аан дойду чөмпүйүөнэ, «Хотугу сулус» уордьан кавалера Степанида Артахинова маастар-кы­­лаас ыыппыт. Игорь онно оҕунан ытыыга дьоҕурдааҕын көрдөрбүт. Билигин кини улууһугар оҕунан ытыы күрэҕэр бэлэмнэнэн дьарыктана сылдьар. Күрэхтэһиигэ кыттарга бигэ санаалаах уонна үүнэр көлүөнэни иитиигэ дойдутугар туһаны аҕаларга эрэнэр.