Ытык Күөлгэ саҥа успуорт саалата аһылынна

Таатта оройуонун Ытык Күөл сэлиэнньэтигэр Д.А. Петров аатынан 2 №-дээх орто оскуолатын саҥа модульнай успуорт саалатын үөрүүлээхтик аһыллыыта буолла.

Эбийиэк аныгы успуорт инфраструктуратын тэрийиигэ туһуламмыт «Уһук Илин оскуолаларыгар 50 успуорт саалата» бырагыраама чэрчитинэн тутулунна. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.

Тэрээһиҥҥэ киокусинкай каратеҕа аан дойду үс төгүллээх чөмпүйүөнэ уонна Уһук Илин оскуолаларыгар 50 успуорт саалата бырайыак салайааччыта Хаид Мантаев кытынна. Кини маннык бырайыактар оскуолаҕа оҕолор эт-хаан өттүнэн сайдалларыгар уонна духуобунаһы иитиигэ саҥа кыахтары арыйарын бэлиэтээтэ.

СӨ Үөрэҕин уонна билимин министиэристибэтигэр иһитиннэрбиттэринэн, саҥа саала 450- тан тахса квадратнай миэтэрэ иэннээх типовой модульнай бырайыак. Эбийиэк успуорт араас көрүҥүнэн дьарыктанар аныгы оборудованиенан хааччылынна, киокусинкай, волейбол, баскетбол уонна остуол тенниһин киллэрэн туран. Киэҥ-куоҥ саала физическэй култуура уруоктарыгар уонна эбии секцияларга дьарыктыырга аналлаах.