“Быйыл ойуур баһаарын сэрэтиигэ Саха сиригэр туһааннаах миэрэлэр ылылланнар, быйыл баһаардар түөрт төгүл, уот ылбыт сирдэрэ 14 төгүл кыччаатылар”, – диэн бэлиэтиир РФ бэрэсидьиэнигэр Уһук Илиҥҥи федеральнай уокурукка боломуочуйалааҕа-вице-премьер Юрий Трутнев бүгүҥҥү мунньах кэнниттэн.
– Былырыын Саха сиригэр улахан ойуур баһаардара тураннар, федеральнай ыксаллаах быһыы-майгы биллэриллибитэ. РФ бэрэсидьиэнэ Владимир Путин ойуур баһаарын сэрэтиигэ, умуруорууга элбэх мунньахтары ыытан, манна туһааннаах миэрэлэр ылыныллыбыттара. Бу миэрэлэр бары олоххо киирбиттэрин түмүгэр ойуур баһаара тахсыыта хас эмэ төгүл кыччаата. Ол курдук, ойуур баһаарын ахсаанынан түөрт төгүл, уот ылбыт сиринэн 14 төгүл кыччаата. Манна үбүлээһини таһынан ойуур баһаарыгар кыттар дьон ахсаана элбээбитин, анал оборудованиелар кэлбиттэрин бэлиэтиир тоҕоостоох, – диэн этэр Юрий Петрович.
Вице-премьер Саха сиригэр былырыын буолбут ойуур баһаардарын түмүгүн туһунан этэригэр баһаары бастакы күҥҥэ умуруоруу улахан оруолу ыларын бэлиэтээтэ.
– Уһук Илин федеральнай уокурук Арассыыйа сирин-уотун 40 бырыһыанын ылан олорор. Нэһилиэнньэлээх пууннар ыраах сыталларынан, сорох ардыгар үгүс сиргэ киһи сатаан тиийбэт даҕаны. Ол иһин манна ойуур баһаарын умуруоруу ханнык да эрэгийиэннэрдээҕэр уустук. Ойуур баһаарыгар уот саҥа кыымнанан истэҕинэ, умуруоруу улахан оруолу ылар. Онон биһиги, бастатан туран, үлэбитин-хамнаспытын баһаар бастакы күнүгэр умуруорууга туһаайыахтаахпыт. Оннук гымматахпытына уот саллайан улаатан тахсар, ону бэйэҕит да билэҕит. Билигин баһаары бастакы күнүгэр умуруоруу 63 бырыһыан буоллаҕына, бу көрдөрүүнү 80 %, онтон үөһээ тириэрдии сыала-соруга турар, – диэн иһитиннэрэр кини.
Ону таһынан Юрий Петрович билигин Хабаровскай кыраайга улахан баһаардар бара туралларын эттэ. “Хабаровскайга буола турар баһаардар эмиэ киэҥ сири-уоту ыллылар. Балаһыанньа манна уустук. Ол эрээри эрэгийиэҥҥэ туох баар миэрэлэр барыта ылыныллан тураллар. Билиҥҥи туругунан, кинилэр “МИ-26” бөртөлүөтү көрдөөтүлэр. Бу сайаапканы РФ ЫБММ көрөн ыытыаҕа”, – диэн бэлиэтиир.
Аграфена КУЗЬМИНА
Арассыыйаҕа биллэриллибит Дьиэ кэргэн уонна Саха сиригэр Оҕо саас сылларынан Аллайыаха улууһугар элбэх үлэ ыытылла…
Ыраастаныы киһи киртийдэҕинэ оҥоһуллар. Киһиэхэ кир тастан киирэр. Ким эрэ куһаҕаны эппитэ, күннээҕи олоххо туох…
Өрөспүүбүлүкэ күнүн бары улуустарга өрө көтөҕүллэн туран, бу күннэргэ араас дириҥ ис хоһоонноох тэрээһиннэри ыыттылар.…
Москваҕа муус устар 27 күнүгэр "Центр духовно-нравственное единение "Будущее" НКО уопсастыбаннай бириэмийэтин туттарыы сиэрэ-туома ыытылынна.…
Бу күннэргэ Томпо улууһун Мэҥэ Алдан нэһилиэгин дэлэгээссийэтэ Чөркөөххө кэлэн кыраайы үөрэтээччи Гаврил Вырдылинтан нэһилиэк…
Саха сирин Ил Дархана элбэх оҕолоох ыаллары социальнай өттүнэн өйүүр эбии миэрэлэр тустарынан ыйаахха илии…