Юрий Трутнев: «Дальний Восток – Земля приключений» куонкуруска 200-тэн тахса киинэ ааптардара күрэстэһэллэр

«Дальний Восток – Земля приключений» Бүтүн Арассыыйатааҕы куонкурус дьүүллүүр сүбэтин сыанабылыгар 207 киинэ киирдэ диэн бырайыак көҕүлээччитэ, РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин федеральнай уокуругар боломуочуйалаах бэрэстэбиитэлэ Юрий Трутнев кэпсээтэ.

«Арассыыйа Уһук Илин уокуругун сирэ киэҥ нэлэмэн уонна ураты кэрэ. Ханнык баҕарар турист эбэтэр айанньыт манна бэйэтигэр сөп түбэһэр сынньалаҥы булуон сөп: хаамыыттан саҕалаан араас ыарахаттардаах сатыы суолларга тиийэ уонна ол барыта араас климат зонатыгар. «Дальний Восток – Земля приключений» күрэс көхтөөх туризмы киэҥник тарҕатарга улахан суолталаах. Манна бэйэлэрин сирдэрин-дойдуларын кэрэтин туһунан киинэлэри устубут айанньыттары уонна блогердары түмтэ,  дойду мөлүйүөнүнэн олохтоохторугар Уһук Илин ураты сирдэрин кытта билиһиннэрдэ. Быйыл куонкурус дьүүллүүр сүбэтэ бастыҥнары иккистээн талар. Бу чэпчэки үлэ буолбатах. 200-тэн тахса киинэ ааптара бириис иһин күрэстэһэллэр. Идэтийбит дьүүллүүр сүбэ бастыҥнартан бастыҥнары талыа диэн эрэллээхпин», — диэтэ Юрий Трутнев.

Кыттааччылар ортолоругар Саха сиригэр айан туһунан киинэлэр эмиэ бааллар. Уһук Илин олохтоохторуттан сэргэ Москва уонна Москуба уобалаһын, Алтай, Иркутскай, Калужскай, Кировскай уонна Рязанскай уобаластар олохтоохторо үлэлэрин ыыппыттар.

«Дальний Восток – Земля приключений» Бүтүн Арассыыйатааҕы куонкурус иккис сезонугар кыттарга сайаапка ахсынньы 30 күнүгэр диэри ылыллар. Манна кыттарга Уһук Илин кэрэ миэстэлэринэн айан туһунан 8 мүнүүтэлээх кылгас киинэ устан путешественникдв.рф саайтка дьүүллүүр сүбэ сыанабылыгар ыытыаххытын наада. Урукку сылларга устубут киинэҕитин эмиэ ыытыаххытын сөп: айан 2022 сыл сэтинньи 1 күнүттэн кэлин уонна 2024 сыл ахсынньы 30 күнүгэр диэри уһуллубут буолуохтаах.

Уһук Илиҥҥэ айан туһунан бастыҥ видеоҕа сүрүн бириис – 3 мөлүйүөн солкуобайы, оттон номинациялартан биирдэстэригэр кыайдаххына – 1 мөлүйүөн солкуобайы ылыаххын сөп. Номинацияларга 2-с миэстэҕэ хас биирдиилэригэр 300 000 солкуобай, 3 миэстэҕэ хас биирдиилэригэр – 100 000 солкуобай. Ону таһынан, Чукотка автономнай уокуругун губернатора Владислав Кузнецов Чукоткаҕа айан туһунан устубут кыттааччылар ортолоругар туспа 1 мөлүйүөн солкуобайдаах бирииһи туруорда.

Күрэхтэһиигэ уопуттаах айанньыттар эрэ буолбакка, оҕолор улахан киһи арыаллаах айаннарынан кыттыахтарын сөп. Куонкурус түмүгүнэн кыайыылаахтар бастыҥ үлэлэрэ эрэгийиэннээҕи телеханаалларга көрдөрүллүөхтэрэ, оттон отчуоттуур информациялар уонна видеолар Уһук Илиҥҥи уокуругар туристар маршруттарын интерактивнай каарталарыгар киириэхтэрэ.