“Земскэй учуутал” бырагыраамаҕа докумуоннары хомуйуу саҕаланна

Бэҕэһээҥҥиттэн, 2025 сыл тохсунньу 9 күнүттэн муус устар 15 күнүгэр диэри, “Земскэй учуутал” федеральнай бырайыагынан үлэлии барыан баҕалаахтартан сайаапкалары уонна докумуоннары хомуйан саҕалаатылар.

Ирдэбил быһыытынан, “Земскэй учуутал” бырайыакка 50 тыһ. диэри нэһилиэнньэлээх тыа сирин сэлиэнньэлэрин, оробуочай бөһүөлэктэрин, куораттыы тииптээх бөһүөлэктэрин, куораттарын оскуолаларыгар вакансиялар көрүллэллэр. Бырагыраамаҕа хапсыан баҕалаах учууталлар 5 сылга илии баттаһан үлэлии бараллар.

Куонкуруска кыттааччылар докумуоннарын “Земскэй учуутал” федеральнай портал https://zemteacher.apkpro.ru/ (Банк вакансий – выбрать регион – подать заявку) нөҥүө туталлар.
Сайаапка ыытыллыбытын кэннэ yakutiazemteacher@mail.ru электроннай почтаҕа сканердаммыт докумуоннар куоппуйаларын ыытыахха наада.

Сиһилии эрэгийиэннээҕи оператор бэрэстэбиитэлиттэн 89142322403 эбэтэр эрэгийиэннээҕи оператортан 8 (4112) 506-476 төлөпүөннэринэн ыйыталаһыаххытын сөп. Министиэристибэ саайтыгар барыта ыйыллан турар.