10 тыһыынча ахсаанынан төрөөбүт оҕону эҕэрдэлээтилэр

Сэтинньигэ Саха сиригэр сыл устата 10 тыһыынча оҕо төрөөбүтэ бэлиэтэммитэ. Бу бэлиэ ахсааны куоһарбыт оҕонон Хаҥалас улууһун Нөмүгүтүттэн Санаайа Жиркова буолбута. Кини сэтинньи 7 күнүгэр Татьяна, Николай Жирковтар дьиэ кэргэттэригэр үһүс оҕонон төрөөбүтэ.

Хаҥалас улууһун дьаһалтатыгар элбэх оҕолоох дьиэ кэргэни ыҥыран чиэстээтилэр. Жирковтары улуус баһылыга Олег Иринеев, улуустааҕы социальнай көмүскэл управлениетын салайааччытын э.т.  Светлана Константинова, Нөмүгү баһылыга Наум Устинов эҕэрдэлээтилэр.

— Үүнэр сылы бэрэсидьиэн Дьиэ кэргэн сылынан, Ил Дархан өрөспүүбүлүкэҕэ Оҕо саас сылынан биллэрбиттэрэ улахан суолталаах. Ол аата судаарыстыба таһымыгар дьиэ кэргэн сыаннастарын, ийэ буолууну, оҕолору харыстыырга, өйүүргэ улахан болҕомто ууруллар. 10 тыһыынча ахсааннаах оҕо биһиги улууспутугар төрөөбүтүттэн олус үөрэбин. Кырачаан Санаайаҕа, төрөппүттэригэр, убайдаах эдьиийигэр чэгиэн доруогбуйаны, дьоллоох олоҕу, этэҥҥэ буолууну баҕарабын!» — диэн Олег Иринеев эттэ.

Маны тэҥэ, Татьяна Жирковаҕа үлэ, социальнай сайдыы миниистирэ Елена Волкова эҕэрдэтин, сибидиэтэлистибэтин, «100 сыл оҕолоро» хапытаал сэртипикээтин уонна өйдөбүнньүк бэлэхтэри туттардылар диэн Хаҥалас улууһун дьаһалтатын пресс-сулууспата иһитиннэрэр.

ЗАГС управлениетын Саха сиринээҕи салаата иһитиннэрбитинэн, өрөспүүбүлүкэҕэ 2023 сыл 11 ыйыгар 10 188 оҕо, ол иһигэр 5176 уол уонна 5015 кыыс төрөөбүт.