2025 сылтан ыал буоларга сайабалыанньаны «Госуслуги» портал нөҥүө бэриллэр

Бу сыл тохсунньу 3 күнүттэн ыал буоларга сайабалыанньаны «Госуслуги» портал нөҥүө бэриллэр, оччотугар ЗАГС-ка регистрацияланар эрэ күҥҥэ тиийиэххэ сөп буолла. 

Пааспары кумааҕы көрүҥүнэн ЗАГС-ка ыал буолуу сиэригэр-туомугар ыытыллар күнүгэр бэриллиэхтээх. Ол курдук, бу сыл тохсунньу 3 күнүттэн Гражданскай турук аахталарын судаарыстыбаннай регистрациялааһынын административнай регламеныгар уларытыылар киирдилэр.

«Киһи лиичинэһин туоһулуур докумуоннар ЗАГС-ка судаарыстыбаннай регистрациялыыр күнүгэр бэриллэллэр», — диэн докумуоҥҥа быһаарыллан суруллубут.

Урут бу иннинэ ыал буолууга электроннай көрүҥүнэн сайабалыанньаны биэрии түбэлтэтигэр пааспары регистрацияланыан биир хонук иннинэ ЗАГС-ка илдьэн биэрэр ирдэнэрэ.

Итини таһынан ыал буолууга аккаастааһын биричиинэтэ эмиэ электроннай көрүҥүнэн ыытыллара бэлиэтэнэр. Ол кэннэ ЗАГС-ка тиийэн кумааҕы докумуону сирэй көрсөн ылыахха сөп.