61 саастаах бибилэтиэкэр түөкүттэргэ 1,4 мөлүйүөнү албыннатта

Саха сиригэр олорор 61 саастаах бибилэтиэкэр түөкүттэргэ 1,4 мөлүйүөн солкуобайы албыннатта. Кинини биир биллэр мессенджер нөҥүө эрийэн, баан уонна судаарыстыбаҕа үлэлиир тэрилтэ үлэһиттэрэбит диэн харчытын сойбоппуттар.

Дьахтары кирэдьиит ылан, ол сууманы барытын ыытан, кини аатыгар эрдэ оҥоһуллубут кирэдьиити сабарга күһэйбиттэр. Онон сөп буолбакка, аны «Фонд социального страхования» тэрилтэ аатыттан эрийэн, түөкүттэргэ албыннаппытын иһин 2 мөлүйүөн солкуобай компенсация ааҕыллар диэбиттэр. Онуоха бибилэтиэкэр билэр дьонуттан 300 тыһыынча солкуобайы иэс ылан, саарбах компенсация иһин хамыыһыйаны төлөөбүт.

Онон түмүгэр дьахтар 1,4 мөлүйүөн солкуобайга тэбиллибит.

Саха сиринээҕи ИДьМ олохтоохтору түөкүттэр угаайыларыттан сэрэхтээх буоларга ыҥырар.