Салгыы
Агрооскуолалар тыа хаһаайыстыбатын каадырдарын бэлэмнииргэ төһүү буолуохтара

Агрооскуолалар тыа хаһаайыстыбатын каадырдарын бэлэмнииргэ төһүү буолуохтара

10.04.2024, 14:05
Хаартыска. ааптар түһэриитэ
Бөлөххө киир:

Бүгүн, муус устар 10 күнүгэр,  Дьокуускайга АГАТУ-га Саха Өрөспүүбүлүкэтин Судаарыстыбаннай Мунньаҕын (Ил Түмэнин) Наукаҕа уонна үөрэхтээһиҥҥэ, тыа сирин уонна аграрнай бэлиитикэтигэр сис кэмитиэттэрин “Саха Өрөспүүбүлүкэтин агробырамыысыланнас комплексыгар каадырдары бэлэмнээһин” диэн тиэмэҕэ “төгүрүк остуол” ыытылынна. Тэрээһини  сис кэмитиэттэр бэрэссэдээтэллэрэ Антонина Григорьева уонна Александр Атласов арыйдылар.

Манна тустаах каадырдары бэлэмниир үрдүк уонна орто анал үөрэх кыһаларын сэргэ агрооскуолалар дириэктэрдэрэ кэлбиттэр.

Дириэктэрдэр этиилэрин бу тэрээһин кыттылаахтара олус сэргээтилэр. Максим Максимов (Горнай, Маҕарас сэл.) Маҕарас орто оскуолата дьиэ кэргэни кытта ыкса ситимнээхтик үлэлиирин кэпсээтэ. Ол курдук, оскуола үөрэнээччилэрэ ааспыт 2023 сылга 24 туонна оту кэбиспиттэр, 8 туоннаттан тахса үүтү, 823 киилэ отону туттарбыттар. 10-11 кылаастары тыраахтар уруогунан идэ ыларга бэлэмнииллэрэ кэрэхсэннэ. Онон Маҕарас оҕолоро оскуола эрдэхтэн тыа хаһаайыстыбатыгар чугас буолаларыгар үлэ-хамнас тэриллибит.

Тулагы оскуолатын математика учуутала Изабелла Иванова тыа хаһаайыстыбатын өрөспүүбүлүкэҕэ национальнай бэлиитикэ быһыытынан көрөн сыһыаннастахха эрэ бу боппуруоска хамсааһын тахсыан сөбүн бэлиэтээтэ. Тыа хаһаайыстыбатын идэтигэр үөрэнэр устудьуону хас биирдии агрооскуолаҕа сыһыарарга этии киллэрдэ. Тыа хаһаайыстыбатын министиэристибэтэ агрооскуолалары өйүүрүгэр баҕарда, чуолаан, грант ылыытыгар.

Дириэктэр  Михаил Игнатьев (Чурапчы, Дириҥ) тыа хаһаайыстыбатын сокуонугар кэтэх (подсобнай) хаһаайыстыба киирбэтэҕин аҕынна. “Дириҥ агрооскуолата тирэх пуун буолар кэмэ кэллэ. Идэҕэ үөрэтэр толору кыахтаахпыт. Тырахтарыыс категориятыгар үөрэтиэххэ, оҕолор идэ ылан тахсалларын туһугар. Тустаах академияны кытта ситим нөҥүө (сетевой)  үөрэтиини ыытыа этибит, онно үбүлээһин көрүллүөн наада. Биһиги 20 төбө сүөһүлээхпит эрэри, биир да лиитэрэ сэлээркэ бэриллибэт”, — диэтэ Михаил Спиридонович.

Хатас орто оскуолата (дир. Н.В.Слепцов) 33 сыл “Хатас” сопхуоһу салайбыт, тыа хаһаайыстыбатын сайдыытыгар сүҥкэн кылаатын киллэрбит П.Федорова аатын үйэтитиигэ үлэлээбит. Бу эмиэ тыа хаһаайыстыбатыгар каадырдары иитэн таһаарыыга көмөлөһөрө чахчы.

Уус Алдан улууһун Танда орто оскуолатын дириэктэрэ Константин Готовцев Арассыыйа Үлэ Дьоруойун М.Н.Готовцев аатын сүгэр оскуола тыа сирин үөрэнээччилэрин үлэнэн иитиитин туһунан холобурдаата. Арассыыйа Дьоруойун пиэрмэтигэр, хаһаайыстыбатыгар оҕолор ынах ыырга, тыраахтары ыытарга кытта күрэхтэһэллэр эбит. Билигин үгүс сирдэргэ умнулла быһыытыйбыт сайыҥҥы үлэ сынньалаҥ лааҕырдаахтар, күрүө туталлар. Быһата, үөрэнээччилэрин Михаил Николаевич Готовцев үлэҕэ холобурунан иитэллэр.

“Төгүрүк остуол” кыттыылаахтара баар кыһалҕалары эмиэ аҕыннылар. Тыа хаһайыстыбатын техникумун дириэктэрэ Андрей Самсонов устудьуоннар истипиэндьийэлэрэ  намыһаҕын бэлиэтээтэ (2000 солк. тиийбэт!). Бу боппуруоһу олох сөпкө көтөхтө. Санаан да көрдөххө, техникумҥа үксүн тыа сирин оҕолоро үөрэнэр буолуохтаахтар. АГАТУ ректора Валерий Федоров Ил Түмэн өйүө диэн эрэллээх, АГАТУ-га уонна Өкөтөмнөөҕү филиалыгар уопсай дьиэлэри тутууга көмөлөһөллөрүгэр көрдөстө. Этэргэ дылы, устудьуон үчүгэй усулуобуйаҕа олордоҕуна, үөрэҕин бүтэрэригэр көмөлөөх буолуоҕа.

СӨ Тыатын хаһаайыстыбатын уонна аска-үөлгэ бэлиитикэтин миниистирэ Артем Александров бэйэтин дакылаатыгар эппитин курдук, бүгүҥҥү “төгүрүк остуолга” этиллибит ыллыктаах этиилэр кумааҕыга хаалбатыннар.

+1
0
+1
0
+1
0
+1
0
+1
0
+1
0
+1
1
Бары сонуннар
Салгыы
24 июня
  • 27°C
  • Ощущается: 26°Влажность: 32% Скорость ветра: 6 м/с

Сообщить об опечатке

Текст, который будет отправлен нашим редакторам: