Аҕыйах этээстээх тутууну сайыннарыыга пуорум ыытыллыаҕа

Кулун тутар 17 күнүгэр өрөспүүбүлүкэтээҕи пуорумҥа тутуу, баан эйгэтин бэрэстэбиитэллэрэ, архитектордар, эспиэрдэр чааһынай тутуу уонна «ИЖС» чэрчитинэн кэлим тутуу туһунан ырытыһыахтара.

—Билигин үгүс эдэр ыаллар судаарыстыба өйөбүлүнэн чааһынай дьиэни тутталлар. Чааһынай дьиэни туттуу Дьокуускайга эрэ буолбакка, улуустарга эмиэ киэҥник ыытыллар. Ону тэҥэ, тутуу хаачыстыбатын үрдэтии, аныгылыы саҥа таһымҥа таһаарыы ирдэбилэ сытыытык турада. Кэм ирдэбилинэн,аҕыйах этээстээх дьиэни уонна чааһынай дьиэлэри кэлим тутуу сайдарыгар баҕарабыт, — диэн «Индустрия будущего» стратегическай көҕүлээһиннэри өйүүр тэрилтэ дириэктэрэ Иван Степанов этэр.

Пуорум сүрүн тэрээһинэ – «Аныгы дьиэ уонна тутуу сайдар кыахтара» тиэмэлээх пленарнай сессия. «Дьокуускайга чааһынай дьиэни тутуу», «Аҕыйах этээстээх дьиэлэри кэлим тутуу» тиэмэлэри ырытыһар былаһааккалар үлэлиэхтэрэ.

Пуорумҥа аныгы тутуу матырыйаалларын, кыра этээстээх дьиэлэри кэлим тутууга үп үнүстүрүмүөннэрин, учаастактар кыраныыссаларын кэҥэтии уонна категорияларын уларытыы, чааһынай дьиэлэри тутууга куттала суох буолуу, о.д.а. туһунан билиэххэ сөп.

— Пуорум чэрчитинэн, тутуу хампаанньаларыгар «Тутуллубут дьиэ бастыҥ бырайыага», «Дьиэ бастыҥ бырайыага» диэн куонкурустар буолуохтара. Бу куонкурус чааһынай дьиэни тутуу хаачыстыбатын үрдэтэргэ, мантан сиэттэрэн, куорат таһынааҕы оройуоннар уонна сэлиэнньэлэр көрүҥнэрин тупсарарга туһуланар. Аныгылыы көрүҥнээх чааһынай дьиэни тутууга саҥа бырайыактар тулалыыр эйгэни тупсарарга көмөлөһүөхтэригэр саарбахтаабаппын, — диэн stroy-yakutsk.ru  порталы тэрийээччи Аркадий Назаров кэпсээтэ.

Пуорум тэрийээччилэрэ — «Индустрия будущего» автономнай кэмиэрчэскэйэ суох, стратегическай көҕүлээһиннэри өйүүр тэрилтэ, «ХОУМ» ХЭТ (stroy-yakutsk.ru портал тэрийээччитэ). СӨ тутууга министиэристибэтин, Ил Дархан иһинэн архитектура уонна куораты тутууг управлениетын, LETO киин өйөбүллэринэн ыытыллар.

Хаартыска: А.Назаров тиксэриитэ.