Ахсынньыга «Хаар баабыр» байыаннай-успуорт оонньуулара былааннанар

Быйыл ахсынньыга Саха сиригэр «Хаар баабыр» («Снежный барс») XXVII Өрөспүүбүлүкэтээҕи байыаннай-успуорт оонньуулара былааннаналлар. Бу тэрээһин ыччаты патриоттуу тыыҥҥа иитэр, байыаннай сулууспаҕа бэлэмниир уонна чөл олоҕу тарҕатар сыаллаах 2000 сыллаахтан ыытыллар. Быйылгы оонньуулар Саха Өрөспүүбүлүкэтигэр байыаннай үөрэхтээһин 100 сылын чэрчитинэн тэриллэллэрин туһунан Үөрэх уонна билим министиэристибэтэ иһитиннэрэр.

«Оонньуулар үс түһүмэҕинэн — оскуола, муниципалитет уонна өрөспүүбүлүкэ таһымыгар ыытыллыахтара. Бырагыраамаҕа Ийэ дойду устуоруйатыгар, хаамыыга, АК-74 аптамааты ыһыыга уонна хомуйууга, ботуруон угуутугар, сыал ытыытыгар, физическэй бэлэмнэниигэ уонна байыаннай эстэпиэтэҕэ күрэхтэһиилэр киирдилэр. Быйыл Дьокуускайдааҕы байыаннай оскуола саамай биллиилээх выпускнигын, Сэбиэскэй Сойуус Дьоруойа Николай Чусовской сиэнэ — Александр Находкин Арассыыйа Дьоруойа буолбута олус бэлиэ уонна суолталаах», – диэн бэлиэтииллэр биэдэмистибэҕэ.

Үөрэх уонна билим министиэристибэтэ байыаннай үөрэхтээһин 100 сылыгар аналлаах тэрээһиннэри утумнаахтык ыытар. Ол курдук, үөрэх тэрилтэлэригэр Дьокуускайдааҕы байыаннай оскуола устуоруйатын туһунан лиэксийэлэри ыытарга мэтэдьиичэскэй сүбэлэр бэлэмнэннилэр. Маннык лиэксийэлэр бибилэтиэкэ уруоктарын, кылаас чаастарын, ону тэҥэ байыаннай дьайыылар бэтэрээннэрин уонна АБДь кыттыылаахтарын кытта «Суолталаах кэпсэтии» бырайыак чэрчитинэн ыытыллаллар.

Кулун тутар ыйга буолбут «Билим эдэрдэри аһатар» билим-быраактыка кэмпириэнсийэтигэр оскуола үөрэнээччилэрэ Дьокуускайдааҕы байыаннай оскуола устуоруйатыгар чинчийэр үлэлэрин көмүскээбиттэрэ.

«Маннык суолталаах тэрээһини тэрийбиттэргэ махтанабыт. Уолбутугар бу дьиҥнээх билимҥэ маҥнайгы хардыытынан буолла. Кини тиэмэтэ «Кинилэри умнубаппыт: фроҥҥа уонна тыылга дьиэ кэргэн устуоруйата» диэн этэ. Мирослав саҥаны билбитин таһынан, чинчийэр үлэни ыытарга, дааннайдары наардыырга уонна дьон иннигэр толлубакка тыл этэргэ үөрэннэ. Кини II истиэпэннээх дьупулуомунан наҕараадаланна», – диэн төрөппүттэр Светлана, Андрей Гурьевтар махталларын биллэрдилэр.

Оттон муус устарга Кадетскай оскуола-интэринээт бирииһигэр, «Хорсун буолуу» уордьанын кавалера, АБДь кыттыылааҕа Егор Татаринов сырдык кэриэһигэр уолаттарга боксаҕа өрөспүүбүлүкэтээҕи турнир буолан ааста. Күрэхтэһиигэ 17 хамаандаттан 120-тэн тахса эдэр спортсмен кытынна.

«Егор Евгеньевич — мин оҕо эрдэҕинээҕи доҕорум, бииргэ үөрэммит уолум, боксунан бииргэ дьарыктаммыппыт. Биһиэхэ, Горнай улууһун боксердарыгар, турнирга кыттыбыппыт икки төгүл үөрүүлээх. Маннык күрэхтэһиилэр оҕо майгытын-сигилитин, дьиссипилиинэтин уһаараллар. Турниры үрдүк таһымҥа тэрийбит тэрийээччилэргэ, Егор Евгеньевич дьиэ кэргэнигэр, аймахтарыгар уонна Алексей Корякин дириэктэрдээх Кадетскай оскуолаҕа барҕа махталбын тиэрдэбин», – диэтэ Горнай улууһун тириэньэрэ, успуорт маастара Борис Сидоров.

Ыам ыйын 8 күнүгэр буолбут «Ыам ыйа. Саас. Кыайыы» диэн кэнсиэр ураты суолталаах тэрээһин буолла. Ону таһынан, Дьокуускайдааҕы национальнай байыаннай оскуола Знамятын куоппуйатын эстэпиэтэтэ – патриотическай аахсыйа киэҥ далааһыннаахтык барда.

«Бүгүҥҥү күҥҥэ Знамя куоппуйата Муома улууһугар баар. Эстэпиэтэ өрөспүүбүлүкэ 22 муниципальнай тэриллиитин уҥуордаата. Юнармеецтар уонна байыаннай-патриотическай кулууптар чилиэннэрэ  Знамяны ытык бэлиэ курдук үөрүүлээхтик көрсөллөр. Тэрээһиннэргэ АБДь уонна байыаннай дьайыылар бэтэрээннэрэ, олохтоох дьаһалталар бэрэстэбиитэллэрэ кытталлар», — диэн Дьокуускайдааҕы кадетскай оскуола-интэринээт патриоттуу иитиигэ салаатын салайааччыта Роман Попов кэпсээтэ. Кини иһитиннэрбитинэн, байыаннай үөрэхтээһин 100 сылын түмүктүүр үөрүүлээх тэрээһин ахсынньы 9 күнүгэр ыытыллыаҕа.

Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата