«Пилоты будущего» куонкуруска дрону салайыыга саха оҕолоро бастыҥнар ортолоругар киирдилэр

Дьокуускайдааҕы Саха политиэхиньиичэскэй лиссиэйигэр «Пилоты будущего» диэн дрону салайыыга Бүтүн Арассыыйатааҕы куонкурус эрэгийиэннээҕи түһүмэҕэ түмүктэннэ. Манна бастыҥ көрдөрүүлээх оҕолор Москваҕа буолар финалга Саха сирин аатын көмүскүөхтэрэ.

«Бастакылар хамсааһыннара» уонна Арассыыйатааҕы дрон күрэҕин Федерацията тэрийбит күрэхтэһиитигэр Саха сирин 22 улууһуттан 273 оҕо кытынна (барыта 550 сайаапка киирбит).

Оҕолор үс хайысханан илин-кэлин түстүлэр:

• Теорияны билии;
• Симуляторга (көмпүүтэргэ) дрону салайыы;
• 75 мм кылаастаах дроннарынан күрэхтэһии.

Бастыҥ биэс миэстэни ылбыт оҕолор бары Москваҕа барар путевканан наҕараадаланнылар:

• 1 миэстэ — Курманов Владислав (Мииринэй улууһа);
• 2 миэстэ — Анисимов Алгыс (Хаҥалас улууһа);
• 3 миэстэ — Иванов Айуран (Дьокуускай к.);
• 4 миэстэ — Горохов Вадим (Дьокуускай к.);
• 5 миэстэ — Федоров Тимофей (Нерюнгри улууһа).

Финал хаһан буоларый?

Куонкурус түмүктүүр түһүмэҕэ сэтинньи 17–22 күннэригэр Москва куоракка буолуоҕа.

Санаттахха, «Пилоты будущего» бырайыак ыччакка саҥа технологиялары баһылыырга, дроннары салайарга үөрэтэр уонна кэскиллээх идэни таларыгар улахан көмөлөөх.

Саха Өрөспүүбүлүкэтин Ил Дарханын уоннан Бырабыыталыстыбатын пресс-сулууспата.

Сиһилии: https://www.sakha.gov.ru/news/68267