Ил Түмэҥҥэ Климент Иванов «Взглянуть в прошлое, чтобы увидеть будущее» диэн саҥа кинигэтин сүрэхтээтилэр

Ил Түмэҥҥэ  судаарыстыбаннай уонна уопсастыбаннай диэйэтэл, Саха Өрөспүүбүлүкэтин норуотун хаһаайыстыбатын үтүөлээх үлэһитэ, «Бочуот Знага», «Үлэ Кыһыл Знамята», «Доҕордоһуу» уордьаннар кавалердара, өрөспүүбүлүкэ бочуоттаах гражданина Климент Иванов «Взглянуть в прошлое, чтобы увидеть будущее»  диэн саҥа кинигэтин сүрэхтээтилэр.

Саха Өрөспүүбүлүкэтин Ил Түмэнин бэрэссэдээтэлэ Алексей Еремеев бэлиэтээбитинэн, саҥа кинигэ Саха сирин маҥнайгы Бэрэсидьиэнэ Михаил Николаев сырдык кэриэһигэр ананар.

«Климент Егорович – билиҥҥи Саха сирин саамай уһулуччулаах диэйэтэллэриттэн биирдэстэрэ. Кини – САССР Үрдүкү Сэбиэтин XII ыҥырыытын салайбыта, Михаил Николаев саамай чугас үөлээннээҕэ. Кини салайыытынан 1992 сыл муус устар 4 күнүгэр биһиги өрөспүүбүлүкэбит Төрүт сокуона – Конституция ылыллыбыта. Саха сирэ салгыы сайдарыгар бигэ акылаат буолбут сүрүн докумуоннар олоххо киирбиттэрэ. Итиэннэ Саха сирин судаарыстыбаннай статуһун туһунан сокуон ылыныллыбыта, 1992 сыл кулун тутар 31 күнүгэр Федеративнай дуогабарга илии баттаһыыга өрөспүүбүлүкэ дэлэгээссийэтин салайбыта», — диэтэ Алексей Еремеев.

Ил Түмэҥҥэ бэлиэтээбиттэринэн, Климент Иванов бүгүҥҥү күҥҥэ диэри салайааччылар хас да көлүөнэлэрин сүбэһитэ-учуутала буолар. Кини эдэр исписэлиистэргэ туруоруллубут соругу быһаарар дьоҕуру, олохтоох уонна муударай быһаарыныылары ылынарга үөрэппитэ.

«Билигин биһиги дойдубутугар социальнай хайысха күүстээх буолан, 90 саастаах киһиэхэ эдэр киһи курдук сыһыаннаһаллар. Кырдьаҕас диэн 100 сааһыттан ааҕыллар, ол олус үчүгэй, үлэбит сөптөөх хайысханан барарын туоһулуур. Кинигэбин сүрэхтээн билиһиннэриигэ таһаарыыга кэлбит дьоҥҥо барыларыгар махтанабын. Билиҥҥи кэм тэтиминэн үүнэ-сайда сатыыбын, интэриниэттэн барытын булабын, аныгы технологияларынан туһанабын. Ол эрээри сааһыран истэҕим аайы ааҕарга уонна суруйарга ордук болҕомтобун уурабын. Кыра эрдэхпиттэн ааҕарбын сөбүлүүбүн, оттон билигин кинигэҕэ өбүгэлэрбит, аҕа көлүөнэ дьоммут муударастара, сүбэлэрэ-амалара баарын өйдүүбүн», — диэн санаатын үллэһиннэ Климент Иванов.

Санатан эттэххэ, Климент Иванов 90 сааһын туоларыгар аналлаах уопсастыбаннас үөрүүлээх мунньаҕа сэтинньи 10 күнүгэр — кини төрөөбүт күнүгэр, П.А. Ойуунускай аатынан Саха академическай тыйаатырыгар ыытыллыаҕа.