Айсен Николаев Арассыыйа Бэрэсидьиэнэ солотугар киириитин сиэригэр-туомугар кытынна

Саха Өрөспүүбүлүкэтин Ил Дархана Айсен Николаев Арассыыйа Бэрэсидьиэнэ солотугар киирэр үөрүүлээх сиэригэр-туомугар кытынна.
Ил Дархан санаатын бэйэтин ТГ-ханаалыгар үллэһиннэ.

«Владимир Владимирович – олус күүстээх, мындыр, үгүс үөрүйэхтээх уонна норуоту салайары сатыыр. Биһиги лиидэрбит. Биһиги бэрэсидьиэммит. Чуолаан кини өйөбүлүнэн Арассыыйа аан дойду күүстээх державатыттан биирдэстэрин быһыытынан сайдыы суолун тутарыгар эрэнэбин. Владимир Владимирович бэйэтин этиитигэр биһиги -– туох баар мэһэйи туоруур уонна толкуйдаабытын олоххо киллэрэр биир ньыгыл уонна улуу норуот буоларбытын өссө төгүл тоһоҕолоон бэлиэтээтэ», -– диэн суруйда.

«Кэнники сылларга биһиги өрөспүүбүлүкэбитигэр бэлиэтэнэр сайдыы Владимир Путин өйөбүлүнэн ситиһилиннэ», -– диэтэ эрэгийиэн баһылыга.