Айсен Николаев Кириһиэнньэ сөтүөтүгэр кытынна

Бүгүн, тохсунньу 18 күнүгэр, Ил Дархан Айсен Николаев үгэс быһыытынан Өлүөнэ эбэҕэ Кириһиэнньэ сөтүөтүгэр кытынна.

Үгэс быһыытынан кириһиэнньэ сөтүөлүүр сирин Дьокуускайдааҕы уонна Ленскэйдээҕи архиепископ Роман сибэтии гынна.

«Миэхэ бу православнай үтүө үгэһинэн буолар. Өссө 2006 сыллаахха Дьокуускайга Владыка Зосималыын Кириһиэнньэҕэ сөтүөлүүр үгэһи сөргүппүппүт. Оччолорго сүүрбэ киһи сөтүөлээбитэ. Билигин өрөспүүбүлүкэ үрдүнэн 27 иордань оҥоһуллан, улахан үгэскэ кубулуйда», — диэн эрэгийиэн баһылыга этэр.

Бүгүн Саха сирин 17 муниципальнай тэриллиитигэр 27 сөтүөлүүр сир тэрилиннэ. Манна 17 купель оҥоһулунна уонна уу баһарга диэн 10 ойбону тэстилэр. Миэстэтигэр водолазтар, быыһыыр сулууспа үлэһиттэрэ, миэдиктэр, ГИМС, баһаары утары сулууспа, ЫБММ уонна быраабы араҥаччылыыр уорганнар үлэһиттэрэ бааллар.