Сунтаарга Кириһиэнньэ сөтүөтэ тэриллиэҕэ

Сунтаар сэлиэнньэтигэр тохсунньу 19 күнүгэр үгэскэ кубулуйбут Кириһиэнньэ сөтүөтэ (ууга умсуу) буолуоҕа диэн «Сунтаар сонуннара» телеграм-ханаал иһитиннэрэр.

Тэрээһини Введенскэй таҥара дьиэтэ иилээн-саҕалаан ыытар. Былырыын бэс ыйыгар Сунтаардааҕы таҥара дьиэтигэр иерей Владимир Томскай диэн аҕабыт үлэлии  кэлбит.

Билигин таҥара дьиэтин аннынан, Бүлүү өрүскэ ойбону алларыы үлэтэ ыытыллар. Онон тохсунньу 19 күнүгэр сарсыарда 9-11 чааска Введенскэй таҥара дьиэтигэр анал сулууспа ыытыллыаҕа. Онтон 11 чаастан киэһэ 8 чааска диэри ойбоҥҥо сөтүө тэриллиэҕэ. Манна итэҕэлиттэн  тутулуга суох, ким баҕалаах кэлэн умсуон сөп.

Бу күн ыксаллаах быһыы-майгы сулууспата уонна нэһилиэк көхтөөх дьоно дьуһуурустуба олохтуохтара. Доруобуйата мөлтүү сылдьар, эбэтэр, итирик туруктаах киһи ууга киирэрэ көҥүллэммэт.

Маны тэҥэ, Кириһиэнньэ күн нэһилиэк иһэн, аһаан олорор күөлүгэр  — Мохсоҕоллооххо иерей Владимир ууну сибэтии гыммытын кэннэ, биирдиилээн дьон кэлэн, сибэтиэй ууну ылыахтарын сөп.