Айсен Николаев: «Кыайыылаах көлүөнэҕэ махталбыт муҥура суох»

Ахсынньы 23 күнүгэр Ил Дархан Айсен Николаев Ил Түмэн дьокутааттарыгар туһаайан этиитэ саҕаланна. Кини бу ааһан эрэр сыл Улуу Кыайыы 80 сылыгар анаммытын бэлиэтээтэ.

Өрөспүүбүлүкэҕэ Кыайыы 80 сылынан элбэх үлэ ыытылынна. Быйыл сэрии бэтэрээннэригэр СӨ Бочуоттаах олохтооҕо ааты иҥэрбиттэрэ. Нерюнгри оройуонун Чульман бөһүөлэгин олохтооҕо Валерий Михайлович Спиридонов Москваҕа Кыайыы параадыгар кыттыбыта. Оттон «Өлбөт үйэлээх полк» аахсыйаҕа 145 тыһыынчаттан тахса киһи хаамсыбыта.

— Кыайыы көлүөнэтин дьонугар кыһаллыы, көмөлөһүү, киэн туттуу, махтаныы биһигини бэйэбитин үтүө санаалаах уонна күүстээх оҥорор. Онон бары нэһилиэктэргэ уһуйааннартан саҕалаан, оскуолаларга, тэрилтэлэргэ, уопсастыбаннай түмсүүлэргэ, түмэллэргэ бэтэрээннэри үйэтитиигэ элбэх үлэ оҥоһулунна. Бу биһиги махталбыт, сүгүрүйүүбүт саамай кыра чааһа буолар, — диэн Айсен Николаев эттэ.

Быйыл «Бастионы памяти» бырайыак чэрчитинэн, Мамаай томторугар Сталинградка сэриилэспит буойуннарга аналлаах мемориал турда. Новгородскай уобаласка, Смоленскай уобалас Гагарин куоратыгар эмиэ Саха сирин буойуннарыгар анаммыт  мемориаллар тутулуннулар. Үлэ салҕанар. Эһиил уонна чугастааҕы сылларга мемориаллар Калужскай, Ростовскай уобаластарга, Донецкай Өрөспүүбүлүкэҕэ, Беларусь Өрөспүүбүлүкэтигэр тутуллуохтара.

Оттон Дьокуускайга сахалартан бастакы Сэбиэскэй Сойуус Дьоруойа Федор Кузьмич Поповка пааматынньык турбута Кыайыы 80 сылыгар бэлиэ түгэн буолла.