Айсен Николаев Нерюнгрига эдэр ыалларга дьиэ сэртипикээттэрин туттарда

Ил Дархан Айсен Николаев Нерюнгри оройуонугар оробуочай сырыытын кэмигэр эдэр ыалларга дьиэ сэртипикээттэрин туттарда. Муниципальнай тэриллиигэ судаарыстыбаннай өйөбүл көмөтүнэн 12 ыал олорор усулуобуйатын тупсарыаҕа.

35 саастарыгар диэри эдэр ыалы хаачыстыбалаах олорор дьиэнэн хааччыйыы бырагырааматын иитинэн Нерюнгрига федеральнай, өрөспүүбүлүкэтээҕи уонна олохтоох бүддьүөттэртэн 26 мөлүйүөн солкуобайтан тахса суумма көрүллүбүт.

«Сааскы бырааһынньык иннинэ эдэр ыалларга дьиэ сэртипикээттэрин туттарар икки бүк үөрүүлээх буолла. Маннык өйөбүлү ылбыт дьиэ кэргэттэр тустарыттан олус үөрдүм. Бу бырагыраама Владимир Путин быһаарыытынан үлэлиир. Бу өссө да кэлэр сылларга эмиэ салҕаныаҕа диэн бэлиэтээн этэбин. Биһиги бэрэсидьиэммит Федеральнай мунньахха туһаайан этиитигэр эдэр ыалы, оҕолору, ийэ буолууну өйүүргэ болҕомтотун уурбута, саҥа национальнай бырайыактар баар буолуохтарын туһунан эппитэ», — диэн Айсен Николаев эттэ.