«Норуот уонна аармыйа биир сомоҕо» IV Өрөспүүбүлүкэтээҕи фашизмы утары пуорум ыытыллыаҕа

Сэтинньи 2–7 күннэригэр Саха сиригэр «Норуот уонна аармыйа биир сомоҕо» диэн IV Өрөспүүбүлүкэтээҕи фашизмы утары пуорум ыытыллыаҕа.

«Пуорум сүрүн сыала-соруга — уопсастыбаны биир сомоҕо оҥоруу, эдэр ыччаты төрөөбүт дойдуга таптал тыыныгар иитии, анал байыаннай  дьайыы кыттыылаахтарыгар уонна кинилэр дьиэ кэргэттэригэр өйөбүлүнэн хааччыйыы, ону тэҥэ фашизмы утары охсуһуу буолар. Сүрүн тэрээһиннэр Дьокуускай куоракка Илиҥҥи уонна Соҕурууҥҥу байыаннай уокуруктар, Арассыыйа саҥа эрэгийиэннэрин дэлэгээссийэлэрин, волонтердар уонна Саха сириттэн сылдьар байыаннай сулууспалаахтар кыттыылаах ыытыллыахтара», — диэн бэлиэтээтэ Донбасска көмөлөһөр Хотугулуу-Илиҥҥи пуондатын уонна «Бииргэ — Кыайыыга!» хамыыһыйа координационнай киинин салайааччыта Георгий Куркутов.

Пуорум иннинэ улуустарга нэһилиэнньэни кытта көрсүһүүлэр, оттон үөрэх тэрилтэлэригэр тиэмэҕэ аналлаах кылаас чаастар буоллулар. Сэтинньи 2 күнүттэн «Патриот» ыччат киинигэр анал байыаннай дьайыыга анаммыт быыстапкалар арыллыахтара, патриотическай кэнсиэртэр уонна бэтэрээннэри кытта көрсүһүүлэр ыытыллыахтара.

Сэтинньи 3 күнүгэр Өрөспүүбүлүкэтээҕи медиа-кииҥҥэ байыаннай уокуруктар пресс-кэмпириэнсийэлэрэ буолуоҕа, ону таһынан Ийэ дойду буойуннарын дьиэ кэргэттэрин кэмитиэтэ дьону тус боппуруостарынан көрүөҕэ.

Оттон Норуот биир сомоҕолоһуутун күнүгэр, сэтинньи 4 күнүгэр, киэҥ далааһыннаах успуорт уонна култуура бырагыраамата былааннанар: саха төрүт көрүҥнэригэр турнирдар, «Арассыыйа – мин устуоруйам» түмэл комплексыгар быыстапкалар аһыллыылара уонна патриотическай аахсыйалар.

«Норуот уонна аармыйа биир сомоҕо» IV пуорум киин тэрээһинэ сэтинньи 5 күнүгэр ыытыллыаҕа. Бу күн Норуоттар доҕордоһууларын дьиэтигэр пуорум Пленарнай мунньаҕа уонна «Восток» сэриилэр бөлөхтөрүн хамаандалыыр састаабын, улуустар баһылыктарын, өрөспүүбүлүкэ министиэристибэлэрин уонна биэдэмистибэлэрин бэрэстэбиитэллэрин кыттыылаах төгүрүк остуол буолуоҕа. Эдэр ыччакка уонна иитии үлэтигэр исписэлиистэргэ анал сэминээрдэр тэриллиэхтэрэ.

Сэтинньи 6 күнүгэр Горнай улууһугар уонна Дьокуускайга көрсүһүүлэр салҕаныахтара, ону тэҥэ пуорум түмүгэ таһаарыллыаҕа.

«Ааспыт сылларга пуорум кыттыылаахтара Нам уонна Хаҥалас улуустарыгар сылдьыбыттара. Быйыл Горнай улууһугар муниципальнай тэриллиилэр салайааччыларын уонна уопсастыбаннас бэрэстэбиитэллэрин кыттыылаах төгүрүк остуоллар былаанналлар. АБДь кыттыылаахтарын дьиэ кэргэттэрин уонна Горнай үөрэҕин тэрилтэлэрин ыччатын кытта көрсүһүүлэр тэриллиэхтэрэ», — диэн эбэн эттэ Георгий Куркутов.

Санатан эттэххэ, «Норуот уонна аармыйа биир сомоҕо» Өрөспүүбүлүкэтээҕи фашизмы утары пуорум Саха сиригэр төрдүс төгүлүн ыытыллар. Бу тэрээһин 1942 сыллаахха Аҕа дойду Улуу сэриитин саҕана Дьокуускайга буолбут Антифашистскай миитин улуу дьыалатын уонна үгэһин салгыыр.

Саха Өрөспүүбүлүкэтин Ил Дарханын уонна Бырабыытылыстыбатын пресс-сулууспата