АЛРОСА хапсаҕайга турнира Арассыыйа таһымнаныа

Саха сирин улахан уонна үгэс буолбут турнирдарыттан биирдэстэрэ — хапсаҕайга АЛРОСА бирииһигэр турнир быйылгыттан ыла Бүтүн Арассыыйатааҕы таһымнаныа.

Бу Аркадий Никифоров кэриэһигэр турнир Саха сирин эрэ буолбакка, дойду атын эрэгийиэннэрин күүстээх бөҕөстөрүн түмэрин көрдөрөр.
Манна ыйааһыннарынан  кыайыылаахтар быһаарыллыахтара, ону сэргэ икки абсолютнай чөмпүйүөн иһин киирсиэхтэрэ. Кыайыылаахтар 400 тыһыынча харчынан наҕараадаланыахтара.
Мииринэй оройуонуттан успуорт бастакы маастара Аркадий Никифоров кэриэһигэр АЛРОСА Гран-притыгар эдэрдэр, орто саастаахтар уонна бэтэрээннэр кыттыахтара. Кинилэр ыйааһыннарынан арахсаллар. Күрэхтэһии «А» кылаастааҕа кыайыылаахтар успуорт маастарын нуорматын толороллоругар кыаҕы биэрэр. Турнир ахсынньы 9-11 күннэригэр Мииринэйгэ «Кимберлит» успуорт дыбарыаһыгар буолуоҕа. Күрэхтэһиилэри тэрийээччи – «АЛРОСА» Култуура-успуорт комплекса.
Абсолютнай күрэхтэһиини 75 саастаахтарга  уонна онтон үөһээ саастаахтарга ыытыахтара. Хас биирдии чөмпүйүөн 400 тыһыынчанан наҕараадаланыаҕа. Санатан эттэххэ, 2020 сыллаахха бу үрдүк ааты Бүлүү улууһуттан Дмитрий Ушницкай уонна Уус Алдантан Евгений Алексеев ылбыттара. Пандемия хааччахтааһыннарыттан былырыын күрэхтэһии буолбатаҕа, онтон билигин кыттааччылары саҥа таһымҥа көрсүөхтэрэ.
«Биһиги чаҕылхай аһыллыыны бэлэмниибит, көрөөччүлэри соһутарга кыһаллабыт. Биһиэхэ успуорт чаҕылхай, аныгы шоутун оҥорор сорук турар. Күрэхтэһиини ким баҕарар кэлэн көрүөн сөп. Ыйааһыннарынан көрөн, абсолютнай чөмпүйүөннэр «АЛРОСА» КСК харчынан дьоһун бирииһин ылаллара эмиэ суолталаах», – диэн комплекс дириэктэрэ Мотрена Скрябина кэпсээтэ.
Тэрийээччилэр кэрэхсэбиллээх аһыллыыны эрэ буолбакка, хомуур хапсаҕайы – хамаанданан киирсиини эрэннэрэллэр. Хамаанда иһин биэстии киһи биир тэҥҥэ киирсиҕэ: икки киһи — 70 киилэ ыйааһыҥҥа диэри, икки киһи – 80 киилэҕэ диэри, биир киһи – 90 киилэттэн үөһээҕэ диэри. Кылаабынай судьуйанан САССР сэттэ төгүллээх чөмпүйүөнэ Петр Бурцев ананна.

«АЛРОСА хампаанньа успуорду тиһиктээхтик өйүүрүгэр уонна өрөспүүбүлүкэҕэ успуорт тэрээһиннэрин ыытарыгар махтанабын. Аҥаардас кэнники икки сылга (»Манчаары» успуорт национальнай көрүҥнэригэр спартакиадаттан уонна Саха сирин норуоттарын успуорка оонньууларыттан ураты) мас тардыһыытыгар аан дойду IV чемпионатын өйөөтө, генеральнай спонсорунан буолла. Ити — чөл олоххо сүҥкэн өйөбүл. Биһиги хампаанньабыт күүстээх хамаандатын көмөтүнэн, саҥа күүстээх спортсменнары иитэн таһаарарга эрэнэбин», -– диэн Саха сирин физическэй култуураҕа уонна успуорка миниистирэ Леонид Спиридонов эттэ.

Кини ону сэргэ эһиил кулун тутарга оҕунан ытыыга өрөспүүбүлүкэтээҕи турнир ыытыллара былааннанарын иһитиннэрдэ. Бу турниры АЛРОСА тэрийэр. Ону таһынан АЛРОСА бирииһигэр эдэрдэр ортолоругар көҥүл тустууга Бүтүн Арассыыйатааҕы аһаҕас турнир ыытыллыаҕа.
Хапсаҕайга АЛРОСА Гран-притыгар  ыытыллар турниры «Алмаастаах кыраай» медиахампаанньа теле-ханаалыгар уонна социальнай ситимнэригэр быһа көрдөрүөхтэрэ.
Турнирга кыттарга сайаапкалар 2022 сыл ахсынньы 9 күнүгэр диэри ksk@alrosa.ru электроннай почтанан ылыллаллар. Турнир балаһыанньатын Култуура-успуорт комплексын саайтыгар билсиэххэ сөп.

АЛРОСА Гран-притын  бырагыраамата:

Ахсынньы 9 күнэ (бээтинсэ):

10.00-16.00 мандаат хамыыһыйата;
16.00-18.00 ыйааһыны быһаарыы, мэдиссиинискэй көрүү, ыйааһыннарга сэрэбиэй бырахсыы.

Ахсынньы 10 күнэ (субуота):

09.00-13.00 барыллаан хапсыһыылар;
14.00-15.00 турниры үөрүүлээхтик арыйыы;
15.00-18.00 барыллаан хапсыһыылар.

Ахсынньы 11 күнэ (баскыһыанньа):

10.00-13.00 түмүк аҥаардааҕы көҕүлүүр хапсыһыылар;
14.00-16.00 түмүк хапсыһыылар;
16.00-18.00 абсолютнай күрэхтэһии, хомуур хапсаҕай.