Амма уонна Өлүөнэ өрүстэргэ халаан уута уустуктук ааһар чинчилээх

Сааскы халаан уута, урукку сылларга тэҥнээтэххэ, орто көрдөрүүттэн үрдүк буолара күүтүллэр. Амма уонна Өлүөнэ өрүстэргэ көмүөл уустуктук ааһыан сөп. Бу туһунан  Саха сирин Гидрометкиинин салайааччытын солбуйааччы Вячеслав Шехиров иһитиннэрдэ.

«Быйыл Амма өрүскэ быһыы-майгы уустук буолуоҕа. Ону таһынан Өлүөнэ өрүскэ муус хаайтардаҕына Дьокуускай таһынан   уу таһыма үрдүк буолар чинчилээх», — диэн Вячеслав Шехиров бэлиэтээтэ.

Кини иһитиннэрбитинэн, барыллааһын быһыытынан, быйыл өрүстэр 1-2 хонугунан эрдэлээн эстиэхтэрэ. Өлүөнэ өрүс Ленскэй, Өлүөхүмэ оройуоннарыгар — ыам ыйын 8-15 күннэригэр, Дьокуускай таһынан — ыам ыйын 15-18 күннэригэр, Сангаарга – ыам ыйын 19-21 күннэригэр, Күһүүргэ – ыам ыйын бүтэһик күннэригэр эстэрэ күүтүллэр.

Ыам ыйын ортотуттан Бүлүү, Алдан, Амма өрүстэр муустарын көтөҕүөхтэрэ. Оттон өрөспүүбүлүкэ хотугу уонна хотугулуу-илиҥҥи өттүгэр өрүстэр ыам ыйын үһүс дэкээдэтигэр, сорох өрүстэр бэс ыйын саҥатыгар эстиэхтэрэ.