Видео: Сунтаарга элбэх дьиэ ууга барда

Быйыл Сунтаар сэлиэнньэтин  иһигэр халаан уутуттан элбэх ыал кыһалҕаны уонна мэһэйи көрүстэ. Элбэх видео, хаартыска социальнай ситиминэн тарҕаммытын  үгүс киһи көрбүт буолуохтаах.

-Хаарбыт  уулларан баран тоҥорон, аны ол кэннэ  эмискэччи уулларан, нэһилиэк элбэх ыала ууга барда. Айылҕа бэйэтэ туспа быраабылалаах, сокуоннаах. Ону бу сааскы халаан уутун содулун туоратарга, олохтоох дьаһалта былааннаах үлэни  ыытар. Ол курдук,  дьаһалта уонна «Сунтар» МАУ үлэһиттэрэ буолан, түүн хойукка диэри  Зверев проспегын  уонна Октябрьскай уулусса быһа охсуһууларыгар баар уу ыытар улахан турбаны дьөлөн ыраастаатылар. Бу турба бүөлэнэн, уу бөҕөтүн хаайан турбута. Нэһилиэк баһылыга Эдуард Филиппов «Водоканал» АУо салайааччыларын кытта кэпсэтэн, Сунтаарга баар ППУ (переносная парогенераторная установка) диэн тиэхиньикэни үлэлэтэн, уу ыытар турбаларын ыраастыырга улахан көмө буоллулар. Олохтоох дьаһалта уонна  «Сунтар» МАУ үлэһиттэрэ дьонтон киирбит сайаапкаларынан уонна бэйэлэрин былааннарынан уу ыытар үлэтин толору оҥоро сылдьаллар. Халаан уутун ыытарга Сунтаар нэһилиэгин тэрилтэлэрэ бары биир санаанан түмсэн күүс-көмө буола сылдьаллар, — диэн  «Сунтаар нэһилиэгэ» МТ дьһалтата иһитиннэрдэ.