Аны “Хивустар” үлэлииллэр…

Кэнники сылларга буолбатах сылаас күһүн туран, өрүһүнэн айан билигин даҕаны сабылла илик. Бу ыстатыйа суруллар кэмигэр, алтынньы 25 күнүгэр, паромунан тиэйии ый бүтүөр диэри уһатыллыбыта. Илин эҥээр бу күннэргэ хайдах туоруохха сөбүй? Ырытыаҕыҥ.

ЛОРП кыстыкка бэлэмнэнэр

Саха сиригэр өрүһүнэн тиэйиинэн дьарыктанар сүрүн тэрилтэ — Өлүөнэтээҕи пароходство кыстыкка бэлэмнэниитин алтынньы ортотуттан саҕалаабыта. Билигин Хотугу муустаах байҕал туһаайыытыттан суудуналар Жатайга, кыстыыр сирдэригэр түмүллэн эрэллэр. «Капитан Бородкин» ледоколтан саҕалаан, «Механик Лобанов», «Механик Мельников», «Капитан Зырянов», «Софрон Данилов», «Механик Курчатов», «Капитан Бурковскай», «Капитан Слобожанин» теплоходтар, «ОТ‑2035», «ОТ‑2048», Т‑173, «Механик Винокуров», «Ленанефть‑2032», «Ленанефть‑2055», «Лена-нефть‑2057», «Ленанефть‑2060» таһаҕас тиэйэр суудуналар бары быйылгы навигацияны түмүктүүр айаннарыгар турдулар. Жатайдааҕы суудуналары өрөмүөннүүр собуот дириэктэрэ Иван Игнашев этэринэн, билигин устар ааллары тутуу үлэтэ көхтөөхтүк бара турар.

— Инвентары ааҕар хамыыһыйа тэрилиннэ, 2023–2024 сыллаах навигация икки ардынааҕы кэрчиккэ куттала суох харайыы, өрөмүөҥҥэ бэлэмнээһин, мууска туруоруу үлэтигэр бэлэмнии сылдьабыт. Собуот кэлэктиибигэр оҥоһуллуохтаах үлэ кээмэйэ өйдөнөр, сорудах ылыллан, баар күүһү түмээһин ыытылынна, — диэн кини кэпсээтэ.

Паром үлэтэ тохтуу илик

Күн-дьыл туругун билгэтигэр олоҕуран “Паромы Якутии” ХЭУо Аллараа Бэстээх — Дьокуускай туһаайыыга, быйылгы навигацияны сэтинньи саҕаланыытыгар диэри уһатта. Алтынньы 23 күнүттэн саҕалаан паромнар сарсыарда 6.00 чаастан хоҥнор буолбуттара, бүтэһик паром киэһээ 22.00. чааска сырыытын тохтотуо диэн биллэриллибитэ. Сырыы арыта 40 мүнүүтэ буолар. Уопсайа 12 паром үлэлиир, хамсааһын суудуна туолуутуттан тутулуктаах. Сүрүн уларыйыы алтынньы 21 күнүгэр “Паром‑4” чаарга олорбутуттан таҕыста — паромнар устар суоллара уларыйда. Санатан эттэххэ, өрүскэ уу таһыма түһэн, ити күн дьону, тырааныспары тиэйэн испит “Паром‑4” чычаас сиргэ түбэһэн, алта чаас устата кытылга тиксибэтэҕэ. “Паромы Якутии” ХЭУо салайааччыта Николай Ефимов этэринэн, саҥа устар суол айан кэмин улаханнык уһаппата.

“Хивустар” сырыыларын саҕалаатылар

Дьоҕус суудуна сырыыта тохтоото диэххэ сөп — чааһынай суудуналар кытыл мууһун кыайан туораабат буоллулар, теплоходтар кыстыыр сирдэригэр айаннаатылар. «ЛенаВодСервис» тэрилтэ салгын олбохтоох тырааныспарын алтынньы 22 күнүттэн үлэҕэ таһаарбыта. Бу күҥҥэ биллэринэн, Аллараа Бэстээх — Дьокуускай туһаайыынан 10 “Хивус” уу ньуурунан дайар. «ЛенаВодСервис» салайааччыта Борис Строев этэринэн, паромнар сылдьар буоланнар, пассажир ахсаана элбэҕэ суох. Дьон элбээтэҕинэ, “хивустар” ахсааннара 20‑ҕэ диэри тиийиэҕэ.

Сарсыарда 7.00 чаастан киэһэ 18.00 чааска диэри үлэлииллэр.

“Хивустар” билигин даҕаны 202‑с оройуон туһаайыытынан тутуллубут тохтуур сиртэн айанныыллар. Санатан эттэххэ, 202‑с, 203‑с кыбартаал олохтоохторо тыас-уус улаханыгар мэһэйдэтэн, көһөрөр туһунан туруорсубуттара. Онон саҥа, “Намыв” диэн ааттаммыт тохтуур сири тэйиччи тэрийии үлэтэ ыытыллыбыта. Ол эрэн, Борис Строев этэринэн, билигин сөптөөх халыҥ хаар түһэ илик буолан, саҥа сир куттала суох тиэйии быраабылаларыгар эппиэттээбэт. Онон быстах кэмҥэ “хивустар” урукку сирдэриттэн айанныахтара. Кэнники “Намыв” тохтобулга диэри оптуобустар сылдьыахтара.

Тиэйии сыаната навигация саҕаланыаҕыттан

Чэпчэки тырааныспар:

1,1 туоннаҕа диэри ыйааһыннаах легковой массыына — 685 солк.;
1,1–1,5 туонна ыйааһыннаах легковой массыына — 1100 солк.
1,5–1,6 туонна ыйааһыннаах легковой массыына — 1515 солк.
1,6–2 туонна ыйааһыннаах легковой массыына — 1920 солк.
2–2,5 туонна ыйааһыннаах легковой массыына — 2485 солк.
2,5–3 туонна ыйааһыннаах легковой массыына — 2940 солк.
3 туоннаттан үөһээ ыйааһыннаах легковой массыына — 3450 солк.

Таһаҕас тиэйэр массыыналар:

“Газель” уонна бу кылааска киирэр массыыналар — 3450 солк.
“ГАЗ” массыына кылааһыгар киирэр массыыналар — 7870 солк.
Буорталаах “ЗИЛ” массыына кылааһыгар киирэр массыыналар — 12710 солк.
Бырысыаптаах улахан массыыналар 17540 солкуобайтан 56 тыһыынчаҕа тиийэ;

Оптуобустар:

25 миэстэттэн аҕыйах кыамталаах оптуобустар — 4420 солк.
25 миэстэттэн элбэх кыамталаах оптуобустар — 6905 солк.
«Икарус» кылааһыгар киирэр оптуобустар — 7875 солк.