Арассыыйа бырабыыталыстыбата отставкаҕа барда

Дойду бырабыыталыстыбата уонна бэрэсидьиэн дьаһалтата оптуорунньукка, ыам ыйын 7 күнүгэр, Арассыыйа Бэрэсидьиэнэ Владимир Путин инаугурациятын сиэрин-туомун кэнниттэн отставкаҕа барбыттарын туһунан биллэрдилэр.

«РФ Бырабыыталыстыбата Конституция уонна федеральнай конституционнай сокуон нуормаларыгар олоҕуран, саҥа талыллыбыт бэрэсидьиэн иннигэр боломуочуйатын  тохтотто. Бу туһунан дьаһалга премьер-миниистир Михаил Мишустин илии баттаата», — диэн дойду бырабыыталыстыбатын ТГ-ханаалыгар иһитиннэрдилэр.

Урукку миниистирдэр уонна вице-премьердэр үлэлэрин салгыыллар эрээри, билигин эбээһинэстэрин толорооччулар дуоһунастарыгар олоруохтара. Кинилэр бырабыыталыстыба саҥа састааба бигэргэниэҕэр диэри үлэлиэхтэрэ.

Санаттахха, 2020 сылга Конституцияҕа киирбит уларыйыыларынан, бырабыыталыстыба саҥа чилиэттэрин парламент бигэргэтэр. Инаугурация икки нэдиэлэ ааспытын кэннэ саҥа талыллыбыт бэрэсидьиэн Госдуума көрүүтүгэр премьер-миниистир кандидатуратын көрүүгэ киллэриэхтээх. Бу сыалга биир нэдиэлэ болдьох бэриллэр. Ити кэннэ судаарыстыба аҕа баһылыга бырабыыталыстыба бэрэссэдээтэлин аныыр.