Арассыыйа Дьоруойа Александр Колесов Москваҕа Кыайыы параадыгар ыҥырыылаах ыалдьыт быһыытынан кыттыаҕа

Арассыыйа Дьоруойа, «Сулус» үөрэтэр-эрчийэр киини салайар Александр Колесов Москваҕа Кыайыы Параадыгар ыҥырыылаах ыалдьыт быһыытынан кыттыыны ылыаҕа. Бу туһунан Александр Гаврильевич санаатын үллэһиннэ:

— Улуу Кыайыы параадыгар ыҥырыылаах ыалдьыт буолан кыттыыны ыларбыттан долгуйдум. Саха сириттэн Арассыыйа Дьоруойдара Алексей Неустроев, Филипп Евсеев кыттыыны ылыахтара. Параадка тиийэн бойобуой доҕотторбутун көрсүөхпүт, ону сэргэ Уус Алдан улууһуттан төрүттээх ыччаттар Кыайыы параадыгар строевойунан хаамыахтара.  Ыам ыйын 9 күнэ биһиэхэ, саха норуотугар улахан суолталаах күн. Улуу Кыайыыны уһансыбыт ытык өбүгэлэрбит, дьоммут-сэргэбит бу олоххо олорорбутугар улахан өҥөлөөхтөр. Кинилэр хорсун-хоодуот санаалара, кыайыгас-хотугас, харса суох майгылара Кыайыы өрөгөйүн аҕаллаҕа. Кыайыы параада — биһиги дойдубут модун күүһүн, хорсун, эр санаатын туоһута буолар. Кэлэр кэнэҕэски ыччакка холобур буолар үтүө өйдөбүл.