Арассыыйа Дьоруойдара — Алексей Петров уонна Андрей Григорьев АГАТУ устудьуоннарынан буоллулар

Арассыыйа Дьоруойдара — Алексей Петров уонна Андрей Григорьев Арктикатааҕы агротехнологическай судаарыстыбаннай университет (АГАТУ) устудьуоннарынан буоллулар. Андрей Григорьев-Тута «Агроинженерия», оттон Алексей Петров-Медведь «Зоотехния» идэлэргэ үөрэниэхтэрэ диэн СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэр.

АГАТУ устудьуоннарын, үөрэтэр састаабын уонна үлэһиттэрин Билии күнүнэн СӨ вице-премьерэ Сергей Местников эҕэрдэлээтэ:

— Өрөспүүбүлүкэ университеты өйүүр. Бүгүн ректор Валерий Иннокентьевич Федоров иһитиннэрбитинэн, саҥа үөрэх дьылыгар устудьуоннары ылыы былаана туолбут. Бу эдэр көлүөнэ аграрнай үөрэхтээһини таларын уонна Саха сирэ хас эмит өр сылга саҥа каадырдарынан хааччылларын бэлиэтинэн буолар. Арассыыйа Дьоруойдара Андрей Григорьев уонна Алексей Петров университекка үөрэххэ киирбиттэрэ ону дакаастыыр. Биһиги байыаннай дьайыы кыттыылаахтара хаачыстыбалаах үөрэҕи ылалларыгар бары усулуобуйаны тэрийиэхпит.

Быйыл АГАТУ-га 900 устудьуон бастакы кууруска үөрэнэ киирбит. Манна 19 хайысханан бакалавриат, 1 специалитет, 10 магистратура, 13 аспирантура, 10 орто үөрэх бырагыраамата баар. Билигин 3,7 тыһ. устудьуон үөрэнэр.