«Арассыыйа» пуорум-быыстапкаҕа Саха сирин павильонугар күн аайы 10 тыһыынча ыалдьыт тиийэр

«Арассыыйа» норуоттар икки ардыларынааҕы быыстапка-пуорум иитинэн,  Москваҕа ВДНХ 75 №-дээх павильонугар  «Якутия – Вселенная Олонхо» экспозицияҕа күннэтэ 10 тыһыынча киһи сылдьара биллибит.

СӨ Тас сибээскэ уонна норуоттар дьыалаларыгар министиэристибэтин  чахчыларынан,  сэтинньи 4 күнүттэн тохсунньу 30 күнүгэр диэри Саха сирин экспозициятыгар 800 тыһыынча киһи ыалдьыттаабыт.

Ити кэм устата өрөспүүбүлүкэ истиэндэтигэр 120 дьыалабыай уонна үөрэҕирии тэрээһиннэрэ ыытыллыбыттар. Норуот оонньууларыгар, дьарыктарыгар анаммыт 76 маастар-кылаас тэриллибит, онно 2,5 тыһыынча киһи кыттыбыт. 3700 киһи  Саха сирин туһунан билиигэ таайбараҥнарга оонньообуттар. Павильоҥҥа Саха сирин күнэ ыытыллыбыта, сахалыы киинэлэр, анимациялар көрдөрүллүбүттэрэ.