Арассыыйаҕа биэнсийэни 80 оннугар 70 саастан үрдэтэргэ этии киллэрдилэр

Судаарыстыбаннай Дуума страховой биэнсийэҕэ олохтоммут (фиксированнай) үрдэтиллибит төлөбүрү хас саастан киллэрэр туһунан сокуон барылын киллэриэхтэрэ.

Госдуума дьокутааттарын бөлөҕө сокуон барылын бэлэмнээтэ. Ол курдук, страховой биэнсийэ үрдэтиллибит төлөбүрүн анааһын сааһын аччатыыны билиҥҥи 80 саас оннугар 70-тан олохтуурга диэн этиллэр.  Бу туһунан ТАСС дьаһалга олоҕуран иһитиннэрэр.

Көҕүлээһин ааптардарынан Госдуума үлэҕэ кэмитиэтин бэрэссэдээтэлэ Ярослав Нилов уонна “Справедливая Россия — За правду” фракция салайааччытын бастакы солбуйааччы Дмитрий Гусев буолаллар. Сокуон барыла “Страховой биэнсийэлэр тустарынан” билиҥиҥ сокуоҥҥа уларытыылары киллэриини көрөр.

Билигин 80 туолбут эбэтэр 1 группалаах инбэлииттэргэ үрдэтиллибит төлөбүр көрүллэр, эбилик кээмэйэ кырдьыынан эбэтэр инбэлиит буолуунан страховой биэнсийэҕэ 100 быр. олохтоммут төлөбүргэ тэҥнэһэр.

Киириэхтээх уларыйыыларынан маннык буолара күүтүллэр: 70 туолбут дьоҥҥо олохтоммут төлөбүр 100% улаатыаҕа, оттон 80 туолбут эбэтэр 1 группалаах инбэлииттэргэ надбавка кээмэйэ 200% тэҥнэһиэҕэ.  Маныаха майгынныыр көннөрүүлэри “О государственном пенсионном обеспечении в Российской Федерации” сокуоҥҥа киллэрэргэ былаанныылар, чуолаан, 1 группалаах инбэлииттэргэ инбэлиитинэн биэнсийэҕэ олохтоммут төлөбүрү 200%. үрдэтэргэ этиллэр.

ТАСС-ка Ярослав Нилов кэпсээбитинэн, буортулаах производствоҕа үлэлээбит Луганскай биэнсийэлээҕиттэн киирбит туруорсуу кэнниттэн сокуон барылын маннык идиэйэтэ үөскээбит. Дьокутаат бэлиэтииринэн, үгүс аҕам саастаах дьон үрдээбит төлөбүрүнэн туһаммакка хаалаллар, тоҕо диэтэххэ, 80 саастарыгар диэри үгүстэрэ тиийбэттэр. “Хайы-үйэ 70 саастарыгар үгүс биэнсийэлээхтэргэ эмкэ уонна кинилэри көрүүгэ-харайыыга эбии ороскуоттары көрсөллөр”, — диэтэ дьокутаат.