Арассыыйа күнүгэр Өрөспүүбүлүкэ болуоссатыгар муусука параада буолуоҕа

Дьокуускайга Өрөспүүбүлүкэ болуоссатыгар бүгүн, бэс ыйын 12 күнүгэр, Арассыыйа күнүгэр сарсыарда 11:30 чаастан, «Фанфары Земли Олонхо» V норуоттар икки ардыларынааҕы духовой оркестрдар бэстибээлин үөрүүлээх сабыллыыта уонна муусука параада буолуоҕа. Тэрээһин Саха сиригэр Аармыйа култууратын күннэрин чэрчитинэн ыытыллар.

Куорат олохтоохторугар уонна ыалдьыттарыгар Саха сирин духовой оркестрдара тахсыахтара.
Бырагырааманан болуоссакка патриотическай өрөгөй ырыалара, дьон-сэргэ таптыыр мелодиялара, муусукалара тыһыахтара.

Бүгүн киэһэ Ю.А. Гагарин аатынан култура уонна ускуустуба дыбарыаһыгар «Праздничные мероприятия, посвящённые Дню России в регионах» бырааһынньыктааҕы кэнсиэр буолуоҕа.
Кэнсиэркэ дирижер Павел Васьковскай салайааччылаах солистар уонна «Lena River Brass»  духовой оркестр кыттыахтара.

«Фанфары Земли Олонхо» духуобунай оркестрдар икки ардыларынааҕы бэстибээл ыам ыйын 8 күнүгэр саҕаламмыта. Быйыл тэрээһин Аҕа дойду Улуу сэриитигэр Кыайыы 80 сылыгар ананар.