Атын киһи счетуттан харчы устан сууттанна

Тохсунньу 25 күнүгэр Дьокуускай куораттааҕы суут атын киһи счетуттан харчы уорбут Б. диэн киһиэхэ тэриллибит холуобунай дьыаланы көрдө.

Суут быһаарбытынан, 2023 сыл балаҕан ыйыгар Б. бааҥҥа сылдьан банкоматы туһанан баран тус кэбиниэтиттэн тахсыбакка хаалбыт дьахтар счетугар киирэн, харчытын устубут.

Суукка Б. буруйун билиммит, бараабыт харчытын төннөрбүт.

Б.-га буруйун боруостууругар биир сыл холоон көрөр болдьохтоох икки сылга көҥүлүн быһарга анаатылар. Ол эрээри, эмсэҕэлээччи дьахтардыын биир тылга кэлбиттэринэн буруйун боруостууртан босхолонно.

Суут аактата сокуоннай күүһүгэр киирэ илик диэн Дьокуускай куораттааҕы суут пресс-сулууспата иһитиннэрэр.