Баан сыһыарыытыгар киирэргэ VPN сэрэхтээх дуо?

Тохсунньу 24 күнүттэн Саха сиригэр уонна Уһук Илин куораттарыгар «батсаап», «телеграм» социальнай ситимнэр үлэлээбэт буолан хааллылар.  Ол эрээри, VPN-сервис нөҥүө холбонноххо, үлэлииллэр.  Бу  VPN-сервис  туохха нааданый? Баан сыһыарыыларыгар киирэргэ сэрэхтээх дуо?

Кибер-эспиэрдэр этэллэринэн, VPN-сервис нөҥүө баан сыһыарыытыгар, электроннай буостаҕа киирэр сэрэхтээх эбит. Тоҕо диэтэр, бу сыһыарыыларга учуот дааннайдара, төлөпүөн нүөмэрдэрэ, о.д.а. бааллар.

VPN да араас буолар. Сорохтор төлөбүрдээхтэр, сорохтор босхолор. Түөкүттэргэ эмиэ түбэһиэххэ сөп. Кинилэр аккаунт информациятын уоруохтарын сөп. VPN нөҥүө вируһу да киллэриэхтэрин сөп.

VPN-сервис ханнык саайтарга киирбиккин, доменын уонна IP-аадырыһын көрөр. Маны тэҥэ бэйэҥ IP-аадырыскын, операционнай систиэмэҕин эмиэ көрөр. Ордук босхо  VPN-сервистэр харчы өлөрөр сыалтан, дааннайдары араас тэрилтэлэргэ атыылыахтарын сөп. Холобур, ол тэрилтэлэр ханнык саайтарга киирбиккинэн, туох интэриэстээххинэн көрөн, реклама ыытыахтарын сөп. Түөкүттэр да ол дааннайдары атыылаһыахтарын сөп буоллаҕа.

Онон, баан сыһыарыыларыгар, «Госуслуги» порталга, электроннай буостаҕа (атын да учуоттаах дааннайдаргын хаалларбыт сиргэр) VPN-сервиһи арааран баран, киирэр буол.

VPN диэн — Virtual Private Network, ол эбэтэр, «виртуальнай чааһынай ситим» диэн тылбаастанар. Эн IP-аадырыскын уонна ханна бааргын кистиир. Ол гынан баран, ханнык эрэ саайтка киирэн, учуоттаах дааннайгар (тус кэбиниэккэр) киирдэххинэ, эн ким буоларгын кистээбэт.