Байыас эпэрээссийэлэнэригэр көмөлөстүлэр

«Аҕа дойдуну көмүскээччилэр» байыаннай дьайыы кыттыылаахтарын өйүүр судаарыстыбаннай пуонда Саха сиригэр баар филиалыгар байыаннай дьайыы кыттыылааҕын ийэтэ Галина Л. көрдөспүт.

Кини уола Олег Л. 2023  сыл алтынньытыттан байыаннай дьайыыга хантараагынан барбыт. 2023 сыллаахха ахсынньыга  бааһырбыт. Оттон тохсунньу бүтүүтэ бааһырыытынан кылгас болдьохтоох уоппускаҕа Дьокуускайга кэлбит. Ситэри үтүөрбэтэх буолан, атаҕар кыайан турбат эбит. Бириэмэ баран испит. Сотору кэминэн байыаннай чааһыгар барыахтаах эбит да, бааһа үтүөрбэккэ, байыас санааҕа түспүт. Хаалбыт оскуолактарын ылҕаан ылыыга эпэрээссийэ наада буолбут.

Олунньу 7  күнүгэр ийэ суһал мэдиссиинэ көмөтүн оҥоруу боппуруоһунан пуонда филиалыгар көрдөспүт. Пуонда филиалын исписэлиистэрэ байыаннай сулууспалааҕы өрөспүүбүлүкэтээҕи 2 №-дээх балыыһаҕа — мэдиссиинэ суһал көмөтүн оҥорор кииҥҥэ травматолог-ортопедка суруйтарбыттар. Олегы балыыһаҕа тута киллэрбиттэр уонна икки күнүнэн эпэрээссийэлээбиттэр.

Эпэрээссийэ этэҥҥэ ааспыт, байыаһы атаҕар туруорбуттар. Олунньу 12 күнүгэр кини байыаннай чааһыгар көппүт. Онон пуонда филиалын көмөтүнэн, кылгас кэм иһигэр, байыаннай сулууспалаахха мэдиссиинэ көмөтө оҥоһуллубут.

-Ис сүрэхпиттэн пуонда үлэһиттэригэр, үтүө, истиҥ-иһирэх санаалаах Фирсова Ирина Николаевнаҕа уонна Никифорова Татьяна Васильевнаҕа махтанабын. Эһигинэ суох биһиги кыайыахпыт суоҕа этэ. Эһиэхэ махтал. Кэмигэр көмөҕүт иһин. Сүгүрүйэбин, — диэбит байыас ийэтэ.

РФ Бэрэсидьиэнэ Владимир Путин байыаннай дьайыы кыттыылаахтарыгар уонна  кинилэр дьонноругар кылгас кэм иһигэр көмөнү оҥоруу суолтатын бэлиэтээбитэ. Бары судаарыстыбаннай өҥөлөр түргэнник оҥоһуллаллар.

СӨ Ил Дарханын уонна бырабыыталыстыбатын пресс-сулууспатыттан