Эрхаан уонна Ки Джа байыастарга кэнсиэрдээтилэр (ВИДЕО)

Бэҕэһээ байыастарга умнуллубат ураты күн буолла. 

Кинилэргэ Аҕа дойдуну көмүскээччи күнүнэн, дьон-сэргэ сэҥээрэн, сөбүлээн истэр ырыаһыттара:  Эрхаан уонна Ки Джа анаан-минээн иккитэ кэнсиэрдээтилэр.

Кинилэр байыаннай эпэрээссийэ сиригэр-уотугар дойдулаахтарыгар өйөбүл буолар, күүстэригэр күүс эбэн санааларын бөҕөргөтөр, сүргэлэрин көтөҕөр соруктаах кэлбиттэр. Уонна ити соруктарын, чахчы, толордулар! Байыастар соһуччу бэлэхтэн, бэртээхэй ырыалары истэн сүргэлэрэ улаханнык көтөҕүлүннэ, бука бары ис сүрэхтэриттэн махтал тылларын эттилэр уонна: «Дойдубутугар сылдьар курдук сананныбыт», — дэстилэр.

Кэнсиэри тэрийбит биир кэлим сүрүннүүр киин тирэх пуунун үлэһиттэрэ байыаннай чаас командованиетыгар саллааттары түмэргэ көҥүлү биэрбиттэригэр махтаннылар. Биллэн турар, кэнсиэр кэмигэр куттал үөскээбэтин, суох буоларын курдук бары миэрэлэр кытаанахтык тутуһулуннулар.

Манна эбэн эттэхпинэ, Эрхаан уола манна сулууспалыыр, онон кини уолун көрсөр туһуттан анаан кэлбит. Ки Джа аҕа табаарыһын уонна дойдулааҕын өйөөн, байыастарга кэнсиэрдииргэ тута сөбүлэспит. Кинилэр иккиэн биир улуустар, биир нэһилиэктэр.

Федор ГРИГОРЬЕВ,
анал корр.
Видео Евгений Петров.
Дьокуускай—Донбасс—Дьокуускай.