Бэчээт күнүн көрсө: 2023 сыл туох өйдөбүлү хаалларда?

2023 сыл устуоруйаҕа хаалан, Айыыһыт сылыгар үктэнэн, бу күннэргэ 2024 сыллааҕы барыллары торумнуур уонна ырытар кэммит.

Быйылгы сыллааҕы «Саха сирэ» хаһыат 1-кы нүөмэригэр Бэчээт күнүн көрсө кэллиэгэлэрбит ааспыт сыл хайдах ааспытын уонна үүммүт сылтан тугу күүтэллэрин кэпсээтилэр.

Уоппуска кэмигэр бу суруналыыһы Саха сириттэн булбаккын – бэрт эрдэттэн бэлэмнэнэн, киһибит муораҕа хайаан да тиийбит буолар. Кини ааспыт сылы эмиэ «бэрт сэргэхтик ааста» диэн бэлиэтиир: «Сайын Киргизияҕа Иссык-Кульга сынньанным. Күһүн балтыбын кытта Камчатка хайатын дабайдыбыт, вулканнары кэрэхсээтибит, Тиихэй акыйаан кытылыгар испэктээк көрдүбүт. Онтон дойдубар Чокуурдаахха тиийэн, балыктастым», – диэн кэпсиир.

«Саас хаһыаппытыгар сурутууну ыытыы чэрчитинэн Горнай улууһугар сылдьан, «Уорааннаах» диэн турбаазаҕа путевка сүүйэн, кэрэ айылҕалаах Сиинэҕэ сынньаммытым. Айаным аартыга арыллан, Өлүөнэ очуостарыгар, онтон Буотамаҕа сылдьыбытым», диэн туристыырын сөбүлүүр кэллиэгэбит санаатын үллэстэр. «Кыра кыыһым эксээмэннэрин этэҥҥэ туттаран, орто оскуоланы кыһыл көмүс мэтээлинэн бүтэрэн, сөбүлүүр үөрэҕэр киирэн, барыбытын үөртэ. Улахан кыыспыныын Турция муоратын сылаас уутугар сөтүөлээбиппит, Санкт-Петербург бэлиэ сирдэринэн күүлэйдээбиппит – умнуллубат түгэннэр. Аны бэйэм үбүлүөйбүн чугас дьоммун кытта бэлиэтээн, олус астынным» — бу хаһыат үлэһиттэригэр былырыыҥҥы сыл тугу тосхойон ааспытын кылгастык быһа ойутан билиһиннэрдим.

Сиһилии айар куттаах хаһыатчыттарга 2023 сыл туох умнуллубат өйдөбүлү бэлэхтээбитин уонна үүнэр сылтан кинилэр тугу күүтэллэрин «Саха сирэ» хаһыат  бээтинсэтээҕи нүөмэригэр ааҕыҥ.