Бэйдиэ ыттары утутар сокуону эрэгийиэннэр ылынан эрэллэр

Арассыыйа өссө биир эрэгийиэнигэр бэйдиэ сылдьар ыттары утутар сокуону ылынан эрэллэр.

Ол курдук, Магадан баһылыга Юрий Гришан  эрэгийиэн сокуонугар уларытыылары бэлэмниир туһунан дьаһайбыт. Бу туһунан кини ТГ ханаалга суруйбут.

Бу сыл  тохсунньуга мэр суруйарынан, ыттар саба түһүүлэриттэн 18 киһи эмсэҕэлээбит. Онон, уопсастыбаҕа кутталынан суоһуур,  хаһаайына суох ыттары утутар туһунан миэрэлэр наадаларын ыйбыт. Арассыыйа үрдүнэн бу кыһалҕа сытыырхайбыта ыраатта. Эрэгийиэннэр кыһалҕаны быһаарар, дьону, оҕолору көмүскүүр туһуттан ыксаан кытаанах миэрэлэри ылыммыттара. Чукоткаҕа, Алтайскай уонна Забайкальскай кыраайдарга, ону сэргэ Астрахань уобалаһыгар бэйдиэ сылдьар ыттары утутар миэрэлэр ылыллыбыттара. Биир бастакынан бэйдиэ сылдьар, кутталынан суоһуур хаһаайына суох ыттары утутар сокуону Бурятия ылыммыта. Биһиги саайтпыт Бурятия бэтэринээрийэтин управлениетын салайааччы Амгалан Дармаевы кытта сибээскэ тахсан бу туһунан сиһилии суруйан турабыт. Бэлиэтээн суруйдахха, бу сокуону ылыммыт эрэгийиэннэргэ бэйдиэ сылдьар ыттартан сылтаан киһи өлүүлээх иэдээннэр тахсыбыттара. Киһи олоҕо дуу, ыт олоҕо дуу?