Хабаровскайга үөрүнэн сылдьар бэйдиэ ыттартан эр киһи суорума суолланна

Бэҕэһээ, тохсунньу 16 күнүгэр, үөрүнэн сылдьар бэйдиэ ыттар 38 саастаах эр киһиэхэ саба түспүттэр. Хомойуох иһин эр киһи суһал мэдиссиинэ көмөтүн массыыннатын иһигэр тыына быстыбыт. Бу туһунан Вечерний Хабаровск сайт суруйар. 

Билиҥҥи туругунан борокуратуура бу дьыаланы бэрэбиэркэлии сылдьар. Биһиги Хабаровскай кыраай бэтэринээринэй управлениетыгар сибээскэ таҕыстыбыт. Миигин кытта управление исписэлииһэ Семенова кэпсэттэ. Хомойуох иһин, тарҕанар сурах чахчытын кини иһитиннэрдэ. Билиҥҥи туругунан управление иһигэр бэйдиэ сылдьар ыттар кыһалҕаларын быһаарар сокуон бырайыагын бэлэмнии сылдьабыт диэтэ.

498№-дээх «Кыылга эппиэтинэстээх уонна амарах сыһыан туһунан» сокуон үлэлээбитэ төрдүс сылыгар барда. Бу сокуон олоххо киириэҕиттэн бэйдиэ сылдьар ыттартан эмсэҕэлээн хас да эрэгийиэҥҥэ киһи өлүүлээх түгэннэр бэлиэтэммиттэрэ.

Биһиги саҥа дьыл иннинэ Бурятия бэтэринээринэй управлениетын салайааччы Амгалан Дармаевка сибээскэ тахсан бу кыһалҕа тула кэпсэтэ сылдьыбыппыт. Бэлиэтээн суруйдахха, Алтайга бэйдиэ сылдьар ыттары утутар туһунан сокуон эмиэ ылыныллыбыта.