“Бэйэбит  технологиялаах буолуохтаахпыт”

Бүгүн “Сахамедиа” РИИХ АУО пресс-киинигэр “СӨ БАС сайдыыта” диэн тиэмэҕэ “төгүрүк остуол” буола турар.

“Төгүрүк остуолу” СӨ Бырабыыталыстыбатын Бэрэссэдээтэлин солбуйааччы Анатолий Семенов ыытар. Пилота суох систиэмэлэри өрөспүүбүлүкэҕэ тырааныспарынан хааччыйыыга, чуолаан,  Аартыкаҕа ордук улахан көмөлөөх буолуохтарын туһунан этилиннэ. Онуоха бу ситими үлэлэтиигэ кэккэ сорудах бэриллибит. Каадырынан хааччыйыыга, саҥа үлэ миэстэтин тэрийиигэ эмиэ көмөлөөх буолсу. Олохтоох патеннары туһаныыга болҕомто ууруллуохтаах эбит. Бу бырагырааманы үбүнэн хааччыйыы эмиэ пилота суох ситимнэр сайдыыларын түргэтэтиэҕэ. Саҥаны тэрийии ырытар үлэҕэ эмиэ тирэҕириэхтээх.

“Төгүрүк остуолга” ТХНЧИ дириэктэрэ Михаил Черосов бастакынан кэпсэтиини саҕалаата. Михаил Михайлович бу ситим үлэтигэр картография сайдыыта улахан оруоллаах буолуохтааҕын ыйда. “Маннык ситимнэри хомуйуохпут, көтүтүөхпүт. Ол эрээри тиийэр сирэ чопчу буолуохтаах”, — диэн тоһоҕолоон эттэ учуонай. Уонна Арассыыйаҕа, холобура, дроҥҥа саҥаны айааччылар, мындырдар бааллар, олорго тирэҕириэххэ диэн санаатын үллэһиннэ.

Байыаннай инженер үөрэхтээх Петр Нифонтович Белоруссияҕа, Уфаҕа, Кытайга командировкаларга  сылдьан БАС үлэтин кытта билсибит уопутун кэпсээтэ. Холобур, Кытайга баһаары дрон көмөтүнэн умулларыыны көрдөрбүттэр. 14 күн түспэккэ үлэлиир дрон баар эбит.

Өрөспүүбүлүкэҕэ цифровой сайдыыны түстээччи Анатолий Аскалонович этиилэри истэн баран, сувереннай технологиялары оҥоруохтаахпыт, бырагыраамалар иммунокөмүскэллээх” буолуохтаахтар диэн чопчулаата.

Эргиэн-бырамыысыланнай палата бэрэстэбиитэлэ Иркутскайга агродрону үлэлэтиини кэпсээтэ. Онно бу тэрил көмөтүнэн 8 чаас иһигэр 300 гектар сири таҥастыылларын эттэ. Технологияны туһаныы көмөтүнэн бородууксуйаны ылыыны 25 төгүл үрдэппиттэрин сөҕөн кэпсээтэ.

Саха Өрөспүүбүлүкэтэ ИТ-технологиялары киэҥник баһылаата. Онон бэйэбитигэр БАС сайыннарар кыах толору баар. Бастакы сүбэ мунньаҕы “Төгүрүк остуол” ньыматынан ыытыы саҥаны билиигэ, уопуту атастаһыыга сүрдээх көмөлөөх буолла.

“Төгүрүк остуол” салҕанар.