Бэрэсидьиэн Владимир Путин оскуолаҕа сиэп төлөпүөнүн туттары хааччахтыыр сокуоҥҥа илии баттаата

Бэҕэһээ дойду бэрэсидьиэнэ Владимир Путин уруок кэмигэр сиэп төлөпүөнүн туһанары хааччахтыыр сокуоҥҥа илии баттаата. Сокуону быраап аакталарын саайтыгар таһаардылар.

Үөрэх туһунан сокуоҥҥа уларыйыы киирэн, үөрэх кэмигэр оҕолор сиэп төлөпүөнүн туһаналлара бобуллар. Манна сиэп төлөпүөнэ эрэ буолбакка, сим-каарталаах, төлөпүөн курдук туһаныллар өйдөөх чаһылар эмиэ хабыллаллар. Ол эрээри, тустаах быраабылаттан туорааһын эмиэ баар – оҕо, учуутал олоҕор эбэтэр доруобуйатыгар куттал суоһуур итиэннэ атын ыксаллаах түгэннэргэ туһаналлара көҥүллэнэр.

Аны оскуолаҕа сыһыарыллыбыт уонна кэбиниэттэргэ дьарык кэмигэр туһаныллар гаджеттар бобуллубаттар диэн сокуоҥҥа этиллэр. Парламентскай хаһыат саайтыгар суруйалларынан, оскуола иһинээҕи быраабыла тутуһуллуутун педагогтар уонна оскуола салалтата бэйэлэрэ хонтуруоллуохтара.