Билигин “Госуслугаҕа” бэйэ да, атын дьон да иэһин көрүөххэ сөп

“Госуслуга” биир кэлим порталыгар бэйэҥ иэскин эрэ буолбакка, атын дьон эбэтэр тэрилтэлэр иэстэрин бэрэбиэркэлиир өҥө үлэҕэ киирдэ.

РФ Сыыппараҕа министиэристибэтигэр кэпсээбиттэринэн, бэрэбиэркэ көмөтүнэн кирэдьииккэ, алимеҥҥа, түһээҥҥэ, ыстараапка уонна да атын эбэһээтэлистибэлэргэ төлөнө илик иэстэр тустарынан билэр кыах баар буолла. Онон баайга-дуолга бобуу уурулларыттан, тас дойдуга тахсарга  хааччах үөскээн хааларыттан сэрэнэргэ, контрагеннары кытта үлэлэһии төһө кутталлааҕын сыаналыырга уонна улаханы атыылаһыыга бэлэмнээх буоларга көмөлөһүөҕэ.

Биирдиилээн киһи иэһин бэрэбиэркэлииргэ, кини толору аатын, төрөөбүт күнүн уонна олорор эбэтэр тиийбит эрэгийиэнин ыйыахтааххын. Тэрилтэ иэһин бэрэбиэркэлииргэ эмиэ эрэгийиэнин, аатын уонна аадырыһын биэриэхтээххин.

Өссө маннык өҥө Суут бириистэптэрин федеральнай сулууспатын (ФССС) саайтыгар баар.