Боотурдар Дыгын оонньууларын бүтэһик сүүмэрдиир турнирыгар киирсиэхтэрэ

Бүгүҥҥүттэн, муус устар 18-19 күннэригэр, Дыгын оонньууларын бүтэһик сүүмэрдиир турнира «Дохсун» успуорт уораҕайыгар ыытыллыаҕа.

Ол курдук, Дыгын оонньууларын чөмпүйүөнэ Алексей Уваровскай, Манчаары оонньууларын национальнай многоборьеҕа икки төгүллээх кыайыылааҕа Николай Матаннанов, хотугу многоборьеҕа Арассыыйа муҥутуур чөмпүйүөнэ Алексей Сазонов, хапсаҕайга успуорт маастара Давыд Колесов итиэннэ Тимофей Большаков бүтэһик сүүмэрдээһиҥҥэ холонон көрүөхтэрэ.

Турнир бастакы күнэ атах оонньуутуттан саҕаланар, ол кэнниттэн тутум эргииргэ уонна мас тардыһыытыгар күрэс ыытыллыаҕа. Иккис күҥҥэ оҕунан ытыыга, сүүрүүгэ, хапсаҕайга уонна таас көтөҕүүтүгэр күөн көрсүөхтэрэ.

Санатан эттэххэ, бу сайын күрэхтэһэр Дыгын оонньууларын аҕыс саха боотура биллибитэ: Дьулустан Ноговицын (Горнай улууһа), Артем Дьяконов (Кэбээйи), Айсен Ботуев (Үөһээ Бүлүү), Яков Дмитриев (Кэбээйи), Борис Сдвижков (Амма), Алексей Соколов (Сунтаар), Николай Обоев (Ньурба) уонна Павел Друзьянов (Чурапчы).