Дьокуускайга кулууптар хамаандаларын ортолоругар волейболга күрэхтэһии саҕаланна

Барыта 250 спортсмен 29 хамаанда састаабыгар, 10 эр киһи уонна 19 дьахтар, кулууптар хамаандаларын ортолоругар волейболга I уонна II лигаҕа өрөспүүбүлүкэтээҕи күрэхтэһиигэ кытталлар.

Күрэхтэһии муус устар 26 күнүттэн муус устар 28 күнүгэр диэри «Кыайыы 50 сыла» успуорт дыбарыаһыгар үс былаһаакканан ыытыллар. Күрэхтэһии түмүгүнэн «Бастыҥ оонньооччу», «Бастыҥ саба түһээччи», «Бастыҥ сибээстэһит», «Бастыҥ көмүскээччи» номинациялар туттарыллыахтара. Кыайыылаахтар уонна призердар тустаах грамоталарынан, мэтээллэринэн уонна Кубоктарынан наҕараадаланыахтара. Саха сиринээҕи Волейбол Федерациятыгар барыта 30 волейбол кулууба  регистрацияламмыта биллэр. Итинтэн былырыын 11 волейбол кулууба регистрацияламмыта, 2024 сылга – 8.

Саха сиригэр 32 тыһыынчаттан тахса киһи волейболунан дьарыктанар. 2023 сылга СӨ успуорка уонна физическэй култуураҕа министиэристибэтин былаанынан волейболга 26 күрэхтэһиини ыытыллара күүтүллэрэр, оттон дьиҥ чахчытынан 50 күрэх буолла. Быйыл  19 күрэхтэһии ыытыллыаҕа.

Санатан эттэххэ, дойду Бэрэсидьиэнэ Владимир Путин 2024 сылга дойду нэһилиэнньэтин 55 %- тан итэҕэһэ суох успуордунан утумнаахтык дьарыктанарыгар сорук туруорбута. 

СӨ Ил Дарханын уонна Бырабыыталыстыбатын пресс-сулууспата