Буойас туалетыгар наркотик туттубут

Тырааныспар полициятын үлэһиттэрэ Нерюнгриттан Аллараа Бэстээххэ айанныыр буойаһы арыаллаан иһэн, кинилэртэн куттанан ньиэрбинэйдээбит, саһа сатаабыт киһи баарын бэлиэтии көрбүттэр. Бу туһунан РФ ИДьМ Уһук Илиҥҥи федеральнай уокурукка тырааныспарга управлениета иһитиннэрэр.

Полицейскайдар бу киһини служебнай купеҕа аҕалан докумуоннарын бэрэбиэркэлээбиттэр. Үрүсээгин сиэбиттэн испириистэри уонна мефедроннаах сууну булбуттар. Итиэннэ уорбаланааччы этигэр-сиинигэр инъекция суола баарын көрбүттэр. Бу киһиттэн биэс доза мефедрону былдьаабыттар.

Быһаарыллыбытынан, бу хаста даҕаны сууттана сылдьыбыт Саха сирин олохтооҕо интэриниэт-маҕаһыынтан 20 тыһ.солк. наркотик атыыласпыт. Буойас туалетыгар сороҕун туттубут, онтон тута полицияларга тутуллубут.

Нерюнгри куораттааҕы суудугар сууттанааччы буруйун билиммит. Кини 40 тыһ.солк. ыстараабы төлүүргэ уураахтаммыт.