Бүгүн РФ Киин быыбардыыр хамыыһыйата тэриллибитэ 30 сыла

30 сыл анараа өттүгэр ахсынньы 20 күнүгэр 1993 сыллаахха дойду Бэрэсидьиэнин Ыйааҕынан атын судаарыстыбаннай уорганнартан тутулуга суох Арассыыйа Федерациятын Киин быыбардыыр хамыыһыйата тэриллибитэ.

Арассыыйа Киин быыбардыыр хамыыһыйата ханнык да ситэриилээх уонна сокуону оҥорор да былаас уорганыгар киирсибэт. Дойду Бырабыыталыстыбатын бүддьүөтүгэр быыбары тэрийэргэ уонна ыытарга туспа үп көрүллэр. РФ Киин быыбардыыр хамыыһыйата 30 сыл устатыгар быыбардары уонна референдумнары ыытар сүрүн тэрийээччинэн буолар.

Ол иһигэр кини боломуочуйатыгар гражданнар быыбардыыр бырааптарын тутуһууну хонтуруоллааһын, быыбардыыр тиһик сайдыытыгар хамыыһыйаларга быраап, методическай уонна тэрээһин-тэхэньиичэскэй өттүнэн көмөнү оҥоруу киирэр.

Арассыыйа Киин быыбардыыр хамыыһыйатын састаабыгар быһаарар куоластыыр бырааптаах 15 чилиэннээх: 5 киһи Арассыыйа Бэрэсидьиэнинэн, 5 – Федерация Сэбиэтинэн, 5 –Судаарыстыбаннай Дууманан бигэргэммит киһи буолар. Кинилэр кандидатуралара биэс сылга эрэгийиэннэрдээҕи парламенынан уонна РФ субъектарын үрдүкү дуоһунастаах сирэйдэринэн талыллан, ананаллар.