Салгыы
Бүгүҥҥүттэн “Инникигэ хардыы” кэмпириэнсийэ саҕаланна

Бүгүҥҥүттэн “Инникигэ хардыы” кэмпириэнсийэ саҕаланна

09.01.2024, 18:00
Хаартыска: Людмила Попова.
Бөлөххө киир:

Бүгүҥҥүттэн академик В.П. Ларионов аатынан өрөспүүбүлүкэтээҕи “Инникигэ хардыы” 28-с билим кэмпириэнсийэ-эдэр чинчийээччилэр куонкурустара саҕаланна. Барыта 1800-тэн тахса үөрэнээччи билим 13 хайысхатынан, 42 сиэксийэтинэн үлэтин билиһиннэриэҕэ.

Кэмпириэнсийэ үөрүүлээх аһыллыытыгар Үөрэх уонна билим миниистирэ Нюргуна Соколова: “Саҥа сылга үөрэх бастакы күнэ бу курдук үтүө, кэлин учуонай буолуохтаах, дойдуну, өрөспүүбүлүкэни сайыннарыахтаах дьон тэрээһиниттэн — эдэр чинчийээччилэр кэмпириэнсийэлэриттэн саҕаламмыта үөрүүлээх. Быйыл сиэксийэ ахсаана эбилиннэ. Өскөтүн, былырыын 39 эбит буоллаҕына, быйыл 42 тиийдэ. Кыттааччытын ахсаана эмиэ эбиллэн иһэр, быйыл 1572 оҕо кыттар, итинтэн 10 % Арктика улуустарын  бэрэстэбиитэллэрэ”, — диэн бэлиэтээтэ.

“Өрөгөй” спортсменнары бэлэмниир кииҥҥэ ыытыллыбыт тэрээһин үөрүүлээх аһыллыытын  кэнниттэн миниистир аҕыйах ыйытыыга хоруйдууругар көрдөстүм.

— Нюргуна Афанасьевна, быйылгы кэмпириэнсийэ ааспыт сыллартан туох уратылааҕый?

— Быйылгы кэмпириэнсийэҕэ, бастатан туран, сиэксийэлэрэ элбээтэ. Ааспыт сылларга 39 эбит буоллаҕына, быйыл 42 буолла. АйТи технологияны уонна креативнай хайысхалары киллэрэн биэрдибит. Итиэннэ бырагырааматыгар кыра уларыйыы баар. Бүгүн истиэндэлэри көрөбүт, сарсын оҕолор үлэлэрин көмүскүүллэр, салгыы түмүк тахсан, кыайыылаахтарга Бүтүн Арассыыйатааҕы кэмпириэнсийэлэргэ баралларыгар сүбэлэри-амалары, хайдах бэлэмнэниэхтээхтэрин ыйан-кэрдэн биэриэхтэрэ.

— Кэмпириэнсийэ оҕолорго туох кэскиллээҕий?

— Биһиги кэмпириэнсийэбит кыайыылаахтара федеральнай куонкурустарга кыттарга мэктиэлэнэллэр. Урукку курдук хайысхаларбытын тутан олоробут. Ол курдук, Н.И. Лобачевскай аатынан үөрэнээччилэр кэмпириэнсийэлэрэ, “Инникигэ хардыы” кэмпириэнсийэ, о.д.а. буолаллар. Хайысхаларынан биһиги элбэх оҕобут кыттар.

Өрөспүүбүлүкэтээҕи “Инникигэ хардыы” кэмпириэнсийэ үһүс сылын РФ Үөрэҕириигэ министиэристибэтинэн бигэргэнэр дойду таһымнаах тэрээһиннэр испииһэктэригэр киирэн турар. Манна миэстэлэспиттэр үөрэххэ киирэллэригэр эбии баал ылаллар. Онон бу улахан көрдөрүү дии саныыбын.

Бу кыайыылаах оҕолор ааттара-суоллара, үлэлэрэ салгыы дойду уһулуччу талааннаах оҕолорун испииһэгэр (Федеральнай судаарыстыбаннай информационнай ресурс) киирэр, биһиги үөрэнээччилэрбит федеральнай таһымҥа тахсыыларын көрдөрөр.

Маны сэргэ, “Инникигэ хардыы” өрөспүүбүлүкэ иһигэр эрэ буолбакка, сыал-сорук туруорунан, атын эрэгийиэннэри кытта эмиэ үлэлэһэр. Инньэ гынан, быйыл Чукоткаттан, Приморскай кыраайтан кэмпириэнсийэҕэ сайаапкалары тутан олоробут. Бу биһиги оҕолорбут, кинилэри бэлэмниир педагогтар атын эрэгийиэннэри көрөн салгыы сайдалларыгар, уопут атастаһалларыгар эмиэ кыах биэрэр.

Санатан эттэххэ, “Инникигэ хардыы” кэмпириэнсийэни М.К. Аммосов аатынан Хотугулуу-Илиҥҥи федеральнай университет, Арктикатааҕы судаарыстыбаннай агротехнодогическай университет, РНА СС Саха сиринээҕи билим киинин, Саха сиринээҕи Билим академиятын, Үүнэр көлүөнэ пуондатын өйөбүлүнэн Үөрэх уонна билим министиэристибэтэ, Билим дьоҕус академията тэрийэн ыыталлар. Быйылгы тэрээһин тохсунньу 9-12 күннэригэр буолар.

+1
2
+1
0
+1
0
+1
0
+1
0
+1
0
+1
0
Бары сонуннар
Салгыы
25 июня
  • 20°C
  • Ощущается: 19°Влажность: 40% Скорость ветра: 4 м/с

Сообщить об опечатке

Текст, который будет отправлен нашим редакторам: