Ил Дархаҥҥа 1375 ыйытыы киирдэ

Муус устар 25 күнүгэр, сыллата ыытыллар Ил Дархан Айсен Николаев «Быһа эпиирэ» түмүктэннэ.

ЦУР иһитиннэрбитинэн,  1 375 ыйытыы киирбит. Ордук элбэх ыйытыыны Дьокуускай, Ленскэй, Мииринэй, Нерюнгри, Алдан, Ньурба, Сунтаар олохтоохторо биэрбиттэр.

ЦУР дааннайынан, тырааныспар эйгэтигэр, суолга-иискэ, дьиэни-уоту тутууга, хаарбах дьиэттэн көһөрүүгэ, ипотекаҕа, олорор усулуобуйаны тупсарыыга чэпчэтиилээх бырагыраама туһунан, социальнай көмөҕө, ол иһигэр элбэх оҕолоох дьиэ кэргэттэргэ өйөбүлгэ, тупсарыы үлэтигэр уонна табыгастаах куорат эйгэтин тэрийиигэ, ОДьКХ, уокка-күөскэ, инфраструктураны тупсарыыга, нэһилиэнньэлээх пууннарга күөх төлөнү киллэриигэ сыһыаннаах ыйытыылар бэриллибиттэр.

«Өрөспүүбүлүкэ күнүн көрсө кэпсэтиигэ дьон-сэргэ көхтөөхтүк кыттыбыта миигин үөрдэр. Дьон миэхэ быһаччы эбэтэр социальнай ситимнэринэн элбэхтик ыйыталаһааччылар, санааларын этээччилэр», — диир Ил Дархан.

Ил Дарханы кытта кэпсэтии  “Саха” НКИХ, «Якутия 24», «Россия 24», «Тэтим», «Радио России», «Виктория-Саха», «СТВ-радио» араадьыйа уонна Ил Дархан Айсен Николаев социальнай ситимнэринэн буолла. Үс чаас устата буолбут бырагыраамаҕа Ил Дархан нэһилиэнньэттэн киирбит суолталаах ыйытыыларга хоруйдаата. Ол курдук, экэниэмикэ сайдыытын туһунан, байыаннай дьайыы кыттыылаахтарыгар уонна кинилэр чугас дьонноругар көмө, өйөбүл туһунан, инфраструктурнай уонна социальнай эбийиэктэри тутуу туһунан, уо.д.а. ыйытыылар киирдилэр.

Саха сирин олохтоохторун ыйытыыларыгар «Быһа эпииргэ» СӨ Бырабыыталыстыбатын чилиэннэрэ эмиэ хоруйдаатылар. Ситэриилээх былаас органнарын салайааччылара барыта 250- тэн тахса быһаарыыны биэрдилэр. Эпииргэ киирбит атын ыйытыыларга хоруйдар чугастааҕы кэмҥэ бэриллиэхтэрэ.

СӨ Ил Дарханын уонна Бырабыыталыстыбатын пресс-сулууспата