Быйылгыттан мэдиссиинэ кэллиэстэригэр үөрэх сыла кылгаата

Быйылгыттан мэдиссиинэ кэллиэстэригэр сорох идэлэргэ үөрэх сылын болдьоҕо кылгаата. Ол эбэтэр, холобур, сиэстэрэлэр бу иннинэ 2 сыл 10 ый үөрэнэр эбит буоллахтарына, аны 1 сыл 10 ыйынан номнуо бүтэриэхтэрэ.

Ити орто анал үөрэххэ федеральнай судаарыстыбаннай ыстандаарт уларыйыытын кытта сибээстээх. Бу туһунан өссө былырыын иһиллибитэ эрээри, олоххо быйылгыттан киирдэ. Тугун, хайдаҕын ыйыталаһаары Дьокуускайдааҕы мэдиссиинэ кэллиэһин дириэктэрэ Дмитрий Алексеевы кытта сибээстэһэ сырыттыбыт.

— Бастатан туран, ФГОСка үлэ былырыыҥҥыттан барбыта. Инньэ гынан, холобур, сиэстэрэлэр 1 сыл 10 ый, онтон биэлсэрдэр 2 сыл 10 ый үөрэнэр буоллулар. Биирдии сыллара көҕүрээн биэрдэ. Быйыл киирээччилэр былырыын үөрэххэ киирбиттэри кытта биир сыл диплом ылаллар, тыһыынчаттан тахса устудьуон бүтэриэҕэ.

Тус сыаллаах миэстэҕэ дуогабары СӨ Доруобуйа харыстабылын министиэристибэтин кытта түһэрсиэхтэрин, итиэннэ үөрэхтэрин бүтэрдэхтэринэ дуогабардаспыт сирдэригэр үлэлии тиийиэхтэрин сөп. Биир сыл үлэлээн баран эмиэ тус сыаллаах дуогабар түһэрсэн, салгыы дойду ханнык баҕарар үрдүк үөрэҕин кыһатыгар туттарсар кыахтаахтар.

Иккиһинэн, төрөппүт көрүүтэ суох хаалбыт оҕолор, байыаннай эпэрээссийэ кыттыылаахтарын оҕолоро үөрэххэ туттарсалларыгар саҥа усулуобуйа олохтонно. Маны сиһилии саайтка ааҕыахтарын сөп, — диэн быһаарар.

Ити курдук, “сиэстэрэ дьыалата”, “биэлсэр”, “лабораторнай диагностика”, “эстетическэй өҥө технологията” идэлэргэ үөрэх болдьоҕо кылгаан биэрбит.

Үөрэххэ туттарсааччыларга дириэктэр кэккэ сүбэлэри биэрэр. Бастакытынан, саайтка киирэн үөрэххэ туттарсыы быраабылатын билсэллэрэ наада. Манна эбии баалы хайдах ыларга болҕомто уураллара ордук. Иккиһинэн, мэдиссиинэ идэтигэр туттарсааччы бэйэтэ доруобай уонна ирдэнэр быһыылары (прививка) ылбыт буолуохтаах.

Үөрэх сыла кылгааһына хаачыстыбаҕа, билиигэ дьайыа суоҕа дуо, диэн ыйытыыбар: “Быраактыка бастакы куурустан саҕаланар. Нуучча тыла, математика, омук тылын курдук теоретическай чаастарын көҕүрэттилэр. Бу балары устудьуон 11 сыл устата оскуолаҕа син биир үөрэтэр, хос кэлэн хатылыыллара улахан суолтата суох. Уруккулуу систиэмэҕэ көстүбүт”, — диэн дириэктэр этэр.

Быйыл Дьокуускайдааҕы мэдиссиинэ кэллиэһэ абитуриеннартар докумуоннары олоҕурбут көрүҥүнэн (очно) уонна судаарыстабаннай өҥө (госуслуги) порталын нөҥүө тутар. Сорох идэлэргэ тестирование булгуччу ирдэнэр, маны абитуриент кэллиэскэ бэйэтигэр кэлэн туттарар, ыраахтан олорон толорор табыллыбат.

Манна даҕатан эттэххэ, Дьокуускайдааҕы мэдиссиинэ кэллиэһэ 11 улууска салаалардаах. Дьокуускайга кэлэн үөрэнэр кыаҕа суох дьон улуустарыттан тэйбэккэ, миэстэтигэр олорон үөрэнэн, диплом ылан, миэдик идэтин баһылыыр кыахтаахтар. Сиһилии Дьокуускайдааҕы мэдиссиинэ кэллиэһин саайтыгар ааҕыҥ, билсиҥ.