Дьокуускайдааҕы мэдиссиинэ кэллиэһэ үөрэҕи бүтэрээччилэри үлэҕэ киллэрэргэ бэлэмниир

В.А. Вонгродскай аатынан Дьокуускайдааҕы мэдиссиинэ кэллиэһин быйыл бүтэрэр устудьуоннар саамай долгутуулаах, эппиэтинэстээх түгэҥҥэ бэлэмнэнэллэр – үлэҕэ киириигэ.

Быйыл кэллиэс 7 исписээлинэһин 612 орто үөрэхтээх исписэлииһи таһаарар былааннаах.

Судаарыстыбаннай бүддьүөт суотугар үөрэнэр кэллиэһи бүтэрэр 612 киһи бары үлэҕэ ананыахтаахтар, ол иһигэр 172 тус сыаллаах хайысханан үөрэнээччи. Ону тэҥэ, үлэ миэстэтин бэйэлэрин үптэригэр үөрэнээччилэр ылыахтарын сөп.

Күн бүгүн үөрэҕин бүтэрээччи 612 киһиттэн үс өрүттээх үлэҕэ киирэр барыллаан сөбүлэҥи 107 киһи баттаспыт, ити уопсай бүтэрээччи ахсааныттан 17,5 % буолар, ол иһигэр 23 киһи “эмчит дьыалата”, 45 киһи “сиэстэрэ дьыалата”, 15 киһи “лабораторнай диагностика”, 11 киһи “акушер дьыалата”, 13 киһи “фармация” исписээлинэстэригэр.

Үлэ миэстэтигэр анааһын хамыыһыйатын барыллаан мунньаҕа бу сыл кулун тутар 5-6 күннэригэр былааннанар. Кэллиэс дириэктэрин бирикээһинэн тэриллэр хамыыһыйа мунньаҕар Доруобуйа харыстабылын министиэристибэтин, Нэһилиэнньэ дьарыктаах буолуутун киинин бэрэстэбиитэллэрэ, бииргэ үлэлэһэр социальнай тэрилтэлэр – өрөспүүбүлүкэ уонна куорат доруобуйа харыстабылын тэрилтэлэрэ, мэдиссиинэ чааһынай тэрилтэлэрэ ыҥырыллаллар.

Ити кэмҥэ диэри үөрэҕин бүтэрээччи дьупулуомун ылан баран тугунан дьарыктаныахтааҕын номнуо быһаарыныахтаах – үлэҕэ киирэр эбэтэр салгыы үөрэнэр диэн Дьокуускайдааҕы мэдиссиинэ кэллиэһэ суруйар.