Бүлүү оройуонугар Бырабыыталыстыба отчуота саҕаланна

Бэнидиэнньиккэ, олунньу 17 күнүгэр, Бүлүү оройуонугар Бырабыыталыстыба отчуота саҕаланна. Бырабыыталыстыба бэрэссэдээтэлин солбуйааччы Сергей Местников салайааччылаах оробуочай бөлөҕө түөрт бөлөххө арахсан, 22 нэһилиэнньэлээх пууҕҥа тиийиэхтэрэ. Олохтоохтор отчуот кэмигэр интэриэһиргиир ыйытыктарын биэриэхтэрин сөп.

Былырыын бырабыыталыстыба отчуотун кэмигэр Бүлүү оройуонугар 21 нэһилиэгинэн 3000 тахса киһи хабыллыбыта. Дьүүллэһиигэ 182 боппуруос киирбититтэн, олортон билигин 39-һа туолбут, 70-на үлэҕэ сылдьар. Нэһилиэнньэ боппуруостара доруобуйа, дьиэ-уот, тыа хаһаайыстыбата, сибээс, экология уонна култуура эйгэтин таарыйдылар. Быйыл Бырабыыталыстыба Бэрэссэдээтэлин солбуйааччы Сергей Местников салалтатынан бастакы бөлөх Дьөккөн, Хампа, Бастакы Күүлэт, Иккис Күүлэт уонна Кыһыл Сыыр нэһилиэктэригэр тиийиэҕэ.

Урбаан миниистирэ Тимур Ханды салайааччылаах бөлөх Илбэҥэ, Лөкөчөөн, Күбэйиҥдэ, Тылгыны итиэннэ Кыһыл Сыырга тиийиэҕэ.

Култуураҕа уонна духуобунай сайдыыга миниистирин бастакы солбуйааччы Мария Турантаева салайааччылаах үһүс бөлөх Тааһаҕар, Бөтүҥ, Балаҕаччы, Чочу, Халбаакы уонна Сыдыбыл олохтоохторун кытары көрсүөҕэ.

Тас сибээскэ уонна норуоттар дьылаларыгар миниистирин бастакы солбуйааччы Сергей Хатылыков салайааччылаах төрдүс бөлөх Өкүндү, Чинэкэ, Саатаҕай, Кирово, Чай уонна Тыымпы сылдьыаҕа.

Отчуот кэмигэр Бүлүү оройуонугар 2026 сылга Бүлүүгэ «Дьулуур» успуорка адаптивнай көрүҥнэригэр Саха сирин ХХ спартакиадатын бэлэмнээһиҥҥэ уонна ыытыыга тэрийэр кэмитиэт мунньаҕа ыытыллара былааннанар. Оттон олунньу 19 күнүгэр Кыһыл Сыыр бөһүөлэккэ саҥа успуорт саалатын аһыыллыыта былааннанар.

Түмүккэ, олунньу 19 күнүгэр, Бүлүү куоракка түөрт бөлөх түмүк отчуота буолуоҕа. Саха сирин ситэриилээх былааһын уорганнарын отчуота кулун тутарга диэри ыытыллар. Түмүк тэрээһини «Саха» НКИХ ханаалларыгар көрдөрүөхтэрэ.