Бырабыыталыстыба отчуотугар 15 тыһыынчаттан тахса киһи сырытта

Саха сиригэр Бырабыыталыстыба үлэтин-хамнаһын отчуота салҕанар. Тэрээһиҥҥэ 192 нэһилиэнньэлээх пуун хабыллыбыт.

Кэнники иһитиннэриинэн, Бырабыыталыстыба чилиэннэрин, биэдэмистибэлэр салалталарын кытары кэпсэтиигэ 15563 киһи сылдьыбыта бэлиэтэнэр.

Отчуоттар Горнай, Өймөкөөн, Хаҥалас, Амма, Нерюнгри, Алдан, Эбээн Бытантай, Мииринэй, Ленскэй, Таатта, Анаабыр, Сунтаар, Мэҥэ Хаҥалас, Уус Алдан улуустарыгар ыытылыннылар.

Бүгүн, олунньу 18 күнүгэр, олохтоохтору кытары көрсүһүүлэр Үөһээ Бүлүүгэ, Абыйга, Бүлүүгэ, Кэбээйигэ, Ньурбаҕа, Булуҥҥа, Үөһээ Халымаҕа, Өлүөхүмэҕэ уонна Усуйаанаҕа буола тураллар.

Маны сэргэ, ыытыллыбыт үлэ-хамнас туһунан сиһилии истээри, атах тэпсэн олорон сэһэргэһээри уонна ыйытыыларыгар хоруйдары ылаары Дьааҥы, Томпо, Чурапчы, Эдьигээн, Муома, Нам, Аллайыаха, Аллараа Халыма, Өлөөн, Уус Маайа улуустарын, Жатай, Дьокуускай куорат уокуруктарын олохтоохторо күүтэллэр.

Санатан эттэххэ, СӨ Бырабыыталыстыбатын отчуота олунньу 3 күнүттэн саҕаламмыта уонна кулун тутарга диэри ыытыллар. Саха сирин олохтоохторо ыйытыыларыгар хоруйдары ылар кыахтаахтар. Түмүктэри «Саха» НКИХ ханаалларыгар таһаарыахтара.

Кыраапыгы сигэнэн киирэн көрүөххүтүн сөп: https://www.sakha.gov.ru/news/front/view/id/3480409

СӨ Ил Дарханын уонна Бырабыыталыстыбатын пресс-сулууспата